جاستارعا ەنەرگەتيكالىق سۋسىن ساتۋعا تىيىم سالىنباق

بۇل تۋرالى ۇكىمەت وتىرىسىندا دەنساۋلىق ساقتاۋ ءمينيسترى اجار عينيات ايتتى، دەپ حابارلايدى قازاقپارات ءتىلشىسى.

«سالاماتتى ءومىر سالتى داعدىلارىن قالىپتاستىرۋ بويىنشا مەديتسينالىق- سانيتاريالىق العاشقى كومەك ۇيىمدارىندا 452 سالاماتتى ءومىر سالتى كابينەتى، 4608 دەنساۋلىق مەكتەبى، تەمەكىگە قارسى كابينەت جانە 157 جاستار دەنساۋلىق ورتالىعى جۇمىس ىستەيدى. تەمەكىنى تۇتىنۋدى ازايتۋ ءۇشىن 2023 -جىلعى 1-قاڭتاردان باستاپ تەمەكى ونىمدەرىنە اكتسيزدىڭ ستاۆكالارى كوتەرىلدى. تۇتىنۋدىڭ ەلەكتروندىق جۇيەلەرىنىڭ (ۆەيپتەر)، ولار ءۇشىن حوش يىستەندىرگىشتەر مەن سۇيىقتىقتاردىڭ اينالىمىنا تولىق تىيىم سالۋدى ەنگىزۋ بويىنشا ماجىلىستە زاڭعا وزگەرىستەر قاراستىرىلدى. 21 جاسقا دەيىنگى ادامدارعا ەنەرگەتيكالىق سۋسىنداردى ساتۋعا تىيىم سالۋدى ەنگىزۋ جونىندەگى نورمانى تالقىلاۋ ءراسىمى جۇرگىزىلۋدە»، - دەدى مينيستر.

ونىڭ اتاپ وتۋىنشە، بيىل «اۋىلدىق دەنساۋلىق ساقتاۋدى جاڭعىرتۋ» پيلوتتىق ۇلتتىق جوباسى ىسكە اسىرىلۋدا. جوبا اياسىندا 2025 -جىلدىڭ سوڭىنا دەيىن 655 مەديتسينالىق-سانيتاريالىق العاشقى كومەك وبەكتىسى پايدالانۋعا بەرىلەدى.

«32 زاماناۋي كوپبەيىندى اۋداندىق ورتالىق اۋرۋحانا ۇيىمداستىرىلادى. اۋىلدىق دەنساۋلىق ساقتاۋ ءۇشىن 1100 مەديتسينا قىزمەتكەرى دايارلانادى. اۋىلدىق جەرلەردەگى قولجەتىمسىزدىك ماسەلەسى شەشىلەتىن بولادى. سونىمەن قاتار، سوڭعى جىلدارى 250 العاشقى كومەك كورسەتۋ وبەكتىسى سالىندى»، - دەدى اجار عينيات.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى