جاساندى ينتەللەكت رەپەتيتوردى الماستىرا الا ما؟ - زەرتتەۋ

جاساندى ينتەللەكت رەپەتيتوردى الماستىرا الا ما؟ PLOS One عىلىمي جۋرنالىندا جاريالانعان جاڭا زەرتتەۋ ناتيجەلەرى جاساندى ينتەللەكتتىڭ، سونىڭ ىشىندە ChatGPT-دىڭ، ماتەماتيكانى وقىتۋدا رەپەتيتور سەكىلدى ءتيىمدى بولا الاتىنىن كورسەتكەن.
زەرتتەۋشىلەر ChatGPT-دىڭ ۇسىنعان كەڭەستەرى مەن ادام ماماندارى دايىنداعان كەڭەستەردى سالىستىرىپ، ەكى ءادىستىڭ دە وقۋشىلاردىڭ الگەبرا مەن ستاتيستيكانى مەڭگەرۋىندە ۇقساس ناتيجە بەرەتىنىن انىقتادى.

ءبىلىم بەرۋ تەحنولوگيالارى جاساندى ينتەللەكتتىڭ مۇمكىندىكتەرىن زەرتتەپ، ونى وقۋ ۇدەرىسىن جاقسارتۋعا پايدالانۋعا تىرىسىپ كەلەدى. ChatGPT سياقتى جەتىلدىرىلگەن مودەلدەر ءماتىندى ادامعا ۇقساس ەتىپ قۇراستىرا الاتىندىقتان، ولاردى جەكە وقىتۋدا قولدانۋ مۇمكىندىگى زەرتتەۋشىلەردىڭ قىزىعۋشىلىعىن تۋدىرىپ وتىر. بۇل تەحنولوگيا جەكەلەندىرىلگەن وقىتۋدى قولجەتىمدى ءارى ءتيىمدى ەتۋى مۇمكىن. الايدا، جاساندى ينتەللەكت جۇيەلەرىنىڭ ناقتى وقۋ ۇدەرىسىندەگى تيىمدىلىگى ءالى دە تولىق زەرتتەلگەن جوق، اسىرەسە ماتەماتيكا سياقتى كۇردەلى پاندەر بويىنشا.

ونلاين ءبىلىم بەرۋ ماتەريالدارىن، مىسالى، كەڭەستەر مەن ەسەپتەردىڭ شەشىمدەرىن دايىنداۋ - ۋاقىت پەن قارجىنى تالاپ ەتەتىن پروتسەسس. مۇنداي رەسۋرستاردى دايىنداۋ ءۇشىن مۇعالىمدەر مەن پاندىك ساراپشىلار كوپ ەڭبەكتەنەدى، ماتەريالداردى بىرنەشە رەت تەكسەرىپ، جەتىلدىرەدى. ەگەر ChatGPT سەكىلدى جاساندى ينتەللەكت جۇيەلەرى جوعارى ساپالى وقىتۋ ماتەريالدارىن اۆتوماتتى تۇردە جاساي السا، بۇل وقىتۋ قۇرالدارىن ازىرلەۋگە كەتەتىن شىعىنداردى ايتارلىقتاي ازايتۋى مۇمكىن. وسىلايشا، ءتۇرلى دەڭگەيدەگى ءبىلىم الۋشىلار ءۇشىن رەپەتيتورلىق قولجەتىمدى بولىپ، وقىتۋ ۇدەرىسى جەكەلەندىرىلگەن ءارى ءتيىمدى بولا الادى.

«ChatGPT- ءدىڭ ءبىلىم بەرۋدەگى ءرولى تۋرالى كوپتەگەن سۇراقتار تۋىندادى، ءبىراق ولاردىڭ جاۋابى ءالى تولىق انىقتالماعان ەدى»، - دەيدى زەرتتەۋ اۆتورى، UC Berkeley ءبىلىم مەكتەبىنىڭ دوتسەنتى زاكاري ا. پاردوس.

«ءبىزدى قىزىقتىرعان باستى سۇراقتاردىڭ ءبىرى - ChatGPT ماتەماتيكا سياقتى ناقتى STEM سالالارىندا قانشالىقتى ءجيى قاتەلەسەدى جانە ونىڭ ۇسىنىستارى شىنايى وقۋ ناتيجەلەرىنە اسەر ەتە مە؟».  

زەرتتەۋ بارىسىندا عالىمدار 274 قاتىسۋشىنى Amazon Mechanical Turk پلاتفورماسى ارقىلى جينادى. بارلىق قاتىسۋشىلاردىڭ كەمىندە ورتا ءبىلىم دەڭگەيى بولعان جانە ولار پلاتفورمانىڭ سەنىمدى پايدالانۋشىلارى رەتىندە بەلگىلەنگەن. بۇل ولاردىڭ نەگىزگى ماتەماتيكالىق داعدىلارعا يە ەكەندىگىن جانە ونلاين زەرتتەۋگە سەنىمدى قاتىسا الاتىنىن قامتاماسىز ەتتى.

ەكسپەريمەنت ءۇش توپقا بولىنگەن قاتىسۋشىلار اراسىندا جۇرگىزىلدى:
- ءبىرىنشى توپ ەشقانداي كەڭەس (hint) الماي ەسەپتەر شىعاردى (باقىلاۋ توبى). 
- ەكىنشى توپ ادام تيۋتورلارى جاساعان كەڭەستەردى الدى.
- ءۇشىنشى توپ ChatGPT ۇسىنعان كەڭەستەرمەن جۇمىس ىستەدى.

ءار توپتىڭ قاتىسۋشىلارى ءتورت ءتۇرلى ماتەماتيكالىق ءپاننىڭ ءبىرى بويىنشا ەسەپتەر شەشتى: باستاۋىش الگەبرا، ورتا دەڭگەيلى الگەبرا، جوعارى دەڭگەيلى الگەبرا جانە ستاتيستيكا. بارلىق ەسەپتەر ەركىن قولجەتىمدى ونلاين وقۋلىقتاردان الىنعان.

بۇل زەرتتەۋ ناتيجەلەرى جاساندى ينتەللەكتتىڭ ءبىلىم بەرۋ رەسۋرستارىن جاساۋ مەن رەپەتيتورلىق جۇيەلەردى دامىتۋدا ۇلكەن ءرول اتقارا الاتىنىن كورسەتەدى. ChatGPT-دىڭ ادام جاساعان كەڭەستەرمەن بىردەي تيىمدىلىگى جانە مۇنداي ماتەريالداردى الدەقايدا جىلدام ازىرلەي الاتىندىعى ساپالى ءبىلىمدى قولجەتىمدى ەتۋگە ۇلكەن مۇمكىندىك بەرەدى.

«ءبىر وقۋشىعا ءبىر رەپەتيتور جالداۋ - وتە قىمبات، ءبىراق ءتيىمدى ءادىس»، - دەيدى پاردوس. «جاساندى ينتەللەكت كومەگىمەن رەپەتيتورلىق قىزمەتتەردى دايىنداۋدىڭ قۇنىن تومەندەتۋ جانە ونى كەڭىنەن قولجەتىمدى ەتۋ - ءبىزدىڭ باستى ماقساتىمىز».

زەرتتەۋشىلەر جاقىندا ChatGPT جانە باسقا مودەلدەردىڭ وقۋ ماتەريالدارىن، سونىڭ ىشىندە كۇردەلىلىگى ءارتۇرلى سۇراقتاردى دايىنداۋ قابىلەتىن باعالاعان تاعى ءبىر زەرتتەۋ جاريالادى.

«گەنەراتيۆتى جاساندى ينتەللەكتتى (GenAI) مۇعالىمدەردىڭ جۇمىسىنا ءتيىمدى قۇرال رەتىندە ەنگىزۋ دە زەرتتەۋلەرىمىزدىڭ ماڭىزدى باعىتى بولا الادى»، - دەيدى عالىمدار.

بۇل باعىتتا زەرتتەۋ جۇرگىزىلىپ جاتىر، ال ChatGPT سياقتى تەحنولوگيالار ءبىلىم بەرۋ ۇدەرىسىنە ايتارلىقتاي وزگەرىستەر ەنگىزۋى مۇمكىن.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى