جاساندى ينتەللەكت اقىنداردان وزدى: ادامدارعا ج ي جازعان ولەڭدەر كوبىرەك ۇناعان
استانا. قازاقپارات - جاڭا زەرتتەۋ ناتيجەسى بويىنشا، ادامدار ولەڭدى ادام جازعانىن نەمەسە جاساندى ينتەللەكت جازعانىن اجىراتا المايدى. سوعان قاراماستان، ولار AI جازعان پوەزياعا جوعارى باعا بەرىپ، ونى ىرعاعى مەن كوركەمدىگى جاعىنان تارتىمدى دەپ تاپتى. زەرتتەۋ Scientific Reports جۋرنالىندا جاريالاندى.
زەرتتەۋدى برايان پورتەر مەن ەدۋار ماچەري جۇرگىزدى. ولار ادامداردىڭ AI مەن كاسىبي اقىندار جازعان ولەڭدەردى اجىراتا الا ما جانە بۇل شىعارمالارعا قانداي باعا بەرەدى دەگەن سۇراقتارعا جاۋاپ ىزدەدى.
عالىمدار ەكى ەكسپەريمەنت وتكىزدى:
ءبىرىنشى ەكسپەريمەنت - 1634 ا ق ش تۇرعىنى قاتىسقان زەرتتەۋ. ولارعا تانىمال 10 اعىلشىن ءتىلدى اقىننىڭ 50 ولەڭى (ءار اقىننان 5 ولەڭ) جانە ChatGPT سول ستيلدە جازعان 50 ولەڭ ۇسىنىلدى. قاتىسۋشىلار ءار ولەڭنىڭ اۆتورىن انىقتاۋعا تىرىستى.
ەكىنشى ەكسپەريمەنتكە 696 ادام قاتىستى. ولارعا AI جانە ادام جازعان ولەڭدەردىڭ ساپاسىن باعالاۋ تۋرالى تاپسىرما بەرىلدى. قاتىسۋشىلار شىعارمالاردىڭ جالپى ساپاسى، ىرعاعى، بەينەلىلىگى مەن ەموتسياسىن باعالادى. ولار سونداي-اق ولەڭدەردىڭ اسەرلىلىگى، ماعىنالىلىعى، كوركەمدىگى تۋرالى پىكىر ءبىلدىردى.
زەرتتەۋ ناتيجەسىندە ادامدار AI جازعان ولەڭدەردى ءجيى جوعارى باعالايتىنى انىقتالدى. ولاردىڭ ىرعاعى مەن كوركەمدىگى كوبىرەك ۇناعان. بۇل زەرتتەۋ AI شىعارماشىلىعى مەن ونىڭ ادامدار قابىلداۋىنا اسەرىن تەرەڭىرەك تۇسىنۋگە مۇمكىندىك بەرەدى.
ايتا كەتۋ كەرەك، ەكسپەريمەنتتە قولدانىلعان AI ولەڭدەرى بەلگىلى اقىنداردىڭ ستيلىنە ارنايى ەلىكتەپ جازىلعان. بۇل ولاردىڭ ادام جازعان پوەزياعا قاتتى ۇقساس بولۋىنا سەبەپ بولۋى مۇمكىن.
