جانىبەك ءالىمحان ۇلى قاتىساتىن بوكس كەشى قاي تەلەارنادان كورسەتىلەدى
استانا. KAZINFORM - قازاقستاندىق جانىبەك ءالىمحان ۇلىنىڭ قاتىسۋىمەن 5-ساۋىردە استانا قالاسىندا وتەتىن «Battle of the Brave» كاسىپقوي بوكس كەشىنىڭ قاي تەلەارنادان كورسەتىلەتىنى بەلگىلى بولدى.
ەلورداداعى «بارىس ارەنا» بولاتىن سپورتتىق شارا كوپشىلىك نازارىنا تىكەلەي ەفيردە «Qazaqstan» جانە «Qazsport» تەلەارنالارى ارقىلى ۇسىنىلادى. سونداي-اق الەم جۇرتشىلىعى ونى بەلگىلى ESPN سپورت كانالى ارقىلى تاماشالاي الادى.
بوكس كەشىنىڭ باعدارلاماسىندا وزگە دە قازاقستاندىق سپورتشىلار سىنعا تۇسەدى. اتاپ ايتقاندا، جانكۇيەرلەر سۇلتان زاۋىربەك پەن ازينگا فۋزيلە، باتىر جۇكەمبايەۆ پەن كەين گاردنەر، بالاۋسا مۇزديمان مەن روزاليندا رودريگەس جەكپە-جەگىن كورۋىنە مۇمكىندىگى بار.
وعان قوسا كاسىپقوي رينگتە اعايىندى سابىرحاندار - ماحمۇد پەن تورەحان، وعان قوسا وزبەكستاندىق باحودير جالولوۆتىڭ باسەكەسى وتەدى دەپ جوسپارلانىپ وتىر.
ەسكە سالساق، بۇدان بۇرىن كاسىپقوي بوكسشى جانىبەك ءالىمحان ۇلىنىڭ بوكس كەشىنە بيلەتتەر ساتىلىمعا شىققانىن حابارلاعان ەدىك.
