جامبىلدىق كاسىپكەرلەردى بوپسالاپ كەلگەن قازاقستاندىق رەسەيدەن ەلگە جەتكىزىلدى

قازاقستان رەسپۋبليكاسىنىڭ باس پروكۋراتۋراسى ۇيىمداسقان قىلمىستىق توپتىڭ قۇرامىندا قورقىتىپ الۋ جانە الاياقتىق جاساعانى ءۇشىن قىلمىستىق جاۋاپكەرشىلىككە تارتۋ ماقساتىندا قازاقستان ازاماتىن رەسەي فەدەراتسياسىنان ەكستراديتسيالادى.

بۇرىن سوتتالعانداردان قۇرالعان بۇل توپ 2022-2023 -جىلدار ارالىعىندا جامبىل وبلىسىنىڭ كاسىپكەرلەرى مەن تۇرعىندارىنا كۇش قولدانىپ، بوپسالاۋ، قارىزدى ءوندىرىپ الۋ جانە قورعانشىلىق كورسەتۋمەن اينالىسقان.

— ۇيىمداسقان قىلمىستىق توپتىڭ جەتەكشىسى جانە مۇشەلەرى قازىرگى تاڭدا ءارتۇرلى مەرزىمگە باس بوستاندىعىنان ايىرىلدى، ال كۇدىكتى قىلمىس جاساعاننان كەيىن جاسىرىنىپ، سوعان بايلانىستى حالىقارالىق ىزدەۋگە جاريالانعان. 2024 -جىلدىڭ تامىز ايىندا ول رەسەي فەدەراتسياسىنىڭ امۋر وبلىسىندا ۇستالىپ، ق ر باس پروكۋراتۋراسىنىڭ سۇراۋ سالۋى بويىنشا وتانىنا ەكستراديتسيالاندى. قازىرگى ۋاقىتتا كۇدىكتى تەرگەۋ يزولياتورىنا قامالدى، - دەلىنگەن حابارلامادا.

ايىپتالعان قىلمىستاردى جاساعانى ءۇشىن مۇلكى تاركىلەنىپ، جەتى جىلدان ون بەس جىلعا دەيىنگى مەرزىمگە باس بوستاندىعىنان ايىرۋ تۇرىندەگى جازا قاراستىرىلعان.

وسىعان دەيىن بەس جىلدان بەرى جاسىرىنىپ جۇرگەن قىلمىسكەر گرۋزيادان ەكستراديتسيالانعانىن جازدىق.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى