جامبىلدا جۇگەرىنى تەرەڭ وڭدەيتىن ورتالىق ازياداعى ەڭ ءىرى زاۋىت سالىنادى
تاراز. KAZINFORM - جامبىل وبلىسىندا «Shengtai Biotech Co.، Ltd» جاۋاپكەرشىلىگى شەكتەۋلى سەرىكتەستىگىنىڭ جۇگەرىنى تەرەڭ وڭدەۋ بويىنشا اسا ماڭىزدى، اۋقىمدى ينۆەستيتسيالىق جوباسىن جۇزەگە اسىرۋ باستالدى، دەپ حابارلايدى وبلىستىق اكىمدىكتىڭ باسپا ءسوز قىزمەتى.
زاۋىتتىڭ ىرگەتاسىن قالاۋ راسىمىنە جامبىل وبلىسىنىڭ اكىمى ەربول قاراشوكەيەۆ قاتىستى. جوبانىڭ باستاماشىسى - بيوونىمدەردى وندىرەتىن حالىقارالىق Fufeng Group كومپانياسى.
زاۋىتتىڭ قۋاتتىلىعى جىلىنا 500 مىڭنان 1 ميلليون توننا جۇگەرى وندىرۋگە جەتىپ، كەيىننەن 3 ميلليون تونناعا دەيىن وسەدى. ينۆەستيتسيا كولەمى شامامەن 420 ميلليارد تەڭگەنى قۇرايدى.
جوبا قۇرىلىس كەزەڭىندە 6000 جۇمىس ورنىن اشۋعا، ال پايدالانۋعا بەرىلگەننەن كەيىن 1500 جۇمىس ورنىن قۇرۋعا مۇمكىندىك بەرەدى (باستاپقى كەزەڭدە 400 جۇمىس ورنى اشىلادى).
كومپانيا بيىل 2026-جىلدىڭ ءونىمىن وڭدەۋ ءۇشىن 300 مىڭ توننا جۇگەرى ساتىپ الۋدى جوسپارلاپ وتىر. كاسىپورىن جامبىلدىق شارۋالارمەن وفتەيك-كەلىسىمشارتتار جاساسىپ، ءوزارا ءتيىمدى ارىپتەستىكتىڭ بەرىك نەگىزىن قالاۋدى كوزدەيدى.
جۇگەرىنى تەرەڭ وڭدەۋ قوسىمشا قۇنى جوعارى ونىمدەر - امينقىشقىلدارى (لەيتسين، ۆالين، يزولەيتسين، گلۋتامين، سيترۋلين)، كراحمال، گليۋكوزا الۋعا مۇمكىندىك بەرەدى. قالدىقسىز ءوندىرىس جولعا قويىلادى: ءداندى داقىلداردىڭ قالدىقتارىن مال ازىعى رەتىندە پايدالانۋ جوسپارلانۋدا.
ەربول قاراشوكەيەۆ مەملەكەت باسشىسى قاسىم-جومارت توقايەۆتىڭ تاپسىرماسىنا سايكەس اگروونەركاسىپ كەشەنىندەگى ينۆەستيتسيالىق جوبالاردى جۇزەگە اسىرۋدىڭ ماڭىزدىلىعىن اتاپ ءوتتى.
- ەل پرەزيدەنتى وڭدەلگەن اۋىل شارۋاشىلىعى ونىمدەرىنىڭ ۇلەسىن 70 پايىزعا جەتكىزۋ مەجەسىن قويدى. باسىم باعىتتاردىڭ ءبىرى - ءداندى داقىلداردى تەرەڭ وڭدەۋ. بۇگىنگى جوبا - بۇل مىندەتتىڭ ءىس جۇزىندە جۇزەگە اسۋىنىڭ جارقىن كورىنىسى. زاۋىت ەگىستىكتەن باستاپ تۇتىنۋشىعا دەيىنگى قوسىلعان قۇنى جوعارى ءونىم وندىرەتىن ءبىرتۇتاس جۇيەنى قالىپتاستىرادى. بۇل بىرەگەي جوبا قازاقستاننىڭ بارلىق وڭتۇستىك وڭىرلەرىندە اگروونەركاسىپ كەشەنىن دامىتۋعا تىڭ سەرپىن بەرىپ، جەرگىلىكتى اۋىل شارۋاشىلىعى تاۋارىن وندىرۋشىلەرگە تۇراقتى تابىس اكەلەدى، - دەدى ەربول قاراشوكەيەۆ.
«Fufeng Group Limited» باسقارما ءتوراعاسى لي سيۋەچۋن ۇزاق مەرزىمدى ينۆەستيتسيالىق ىنتىماقتاستىق تۋرالى ايتا كەلە، جامبىل وبلىسىنىڭ الەۋەتى زور ەكەنىن اتاپ ءوتتى. سونداي-اق مەملەكەت تاراپىنان كورسەتىلگەن قولداۋعا العىسىن ءبىلدىردى.
جامبىل وبلىسىنىڭ ينۆەستيتسيالىق قورجىنىندا 10 مىڭنان استام جۇمىس ورنىن قۇرۋدى كوزدەيتىن، جالپى قۇنى 3,6 تريلليون تەڭگەنى قۇرايتىن 82 جوبا بار.
2025-جىلدىڭ 3 ايىندا 120,5 ميلليارد تەڭگە ينۆەستيتسيا تارتىلدى، بۇل وتكەن جىلدىڭ سايكەس كەزەڭىمەن سالىستىرعاندا 37,1 پايىزعا ارتىق.
بيىل جالپى قۇنى 175,2 ميلليارد تەڭگەگە 30 جوبانى ىسكە اسىرۋ جوسپارلانىپ وتىر.
وسىعان دەيىن جامبىل وبلىسىندا بولات وندىرەتىن جاڭا زاۋىتتىڭ قۇرىلىسى باستالعانى بەلگىلى بولدى.
