جامبىل وبلىسىندا 16 ميلليون تەڭگە جىمقىرعان سپورت مەكتەبىنىڭ قىزمەتكەرلەرى سوتتالدى
مەركى اۋدانى پروكۋراتۋراسى مەركى اۋدانى №16-بالالار مەن جاسوسپىرىمدەر سپورت مەكتەبىنىڭ لاۋازىمدى ادامدارى قىزمەتتىك جاعدايىن پايدالانىپ، باسقا دا تۇلعالاردىڭ كومەكتەسۋىمەن اسا ءىرى مولشەردە بيۋدجەت قارجىسىن جىمقىرۋ فاكتىسىن انىقتادى.
مەملەكەتتىك قىزمەتشىلەردىڭ قىلمىستىق ارەكەتتەرى جاستار اراسىندا سپورتتى دامىتۋعا بولىنگەن بيۋدجەت قاراجاتىن جۇمساۋ زاڭدىلىعىن تەكسەرۋ ناتيجەسىندە اشكەرەلەندى، دەپ حابارلايدى Kazinform جامبىل وبلىستىق پروكۋراتۋراسىنىڭ باسپا ءسوز قىزمەتىنە سىلتەمە جاساپ.
شەنەۋنىكتەر بيۋدجەت قارجىسىن جەتكىزىلمەگەن تاۋارلار مەن كورسەتىلمەگەن قىزمەتتەر ءۇشىن اۋدارۋ ارقىلى جىمقىرعانى انىقتالدى.
ياعني، 2020 -جىلدىڭ 29-شى اقپانىندا №16-سپورت مەكتەبى ماكەتتەر جاساۋ جانە مەتالل قۇرىلعىلارىن دايىنداۋ ءۇشىن جالپى قۇنى 2 ميلليون تەڭگەدەن اساتىن سومانى جەتكىزۋشىگە تولەگەن، الايدا سوڭعى اتالعان جۇمىستاردى مۇلدەم ورىنداماي، بيۋدجەت قاراجاتىن №16-سپورت مەكتەبىنىڭ لاۋازىمدى تۇلعالارىنىڭ وتىنىشتەرى بويىنشا قولما-قول اقشاعا ايلاندىرعان جانە ءوزىنىڭ قىزمەتى ءۇشىن جالپى سومادان %10 الىپ وتىرعان.
قىلمىستىق ارەكەتتەر ناتيجەسىندە مەملەكەتكە كەلتىرىلگەن زالال 16 ميلليون تەڭگەدەن استام سومانى قۇرادى.
2022 -جىلدىڭ 10-شى قازانى كۇنى بۇل فاكتىنى مەركى اۋدانى پروكۋراتۋراسى ق ر ق ك-نىڭ 189-بابى 4-بولىگى 2-تارماعى بويىنشا سوتقا دەيىنگى تەرگەۋدىڭ ءبىرىڭعاي ءتىزىلىمىن تىركەپ، وبلىس پروكۋراتۋرانىڭ سوتقا دەيىنگى تەرگەۋ باسقارماسى تەرگەدى.
تەرگەپ-تەكسەرۋ ناتيجەسىندە 7 ادامعا قاتىستى قىلمىستىق ءىس سوتقا ءمانى بويىنشا قاراۋ ءۇشىن جىبەرىلدى.
2023 -جىلدىڭ 3-قاراشاسى كۇنى مەركى اۋداندىق سوتىنىڭ ۇكىمىمەن №16-بالالار مەن جاسوسپىرىمدەر سپورت مەكتەبىنىڭ ديرەكتورى مەن بۇرىنعى ديرەكتورى باس ەسەپشى مەملەكەتتىك قىزمەت اتقارۋ قۇقىعىنان ءومىر بويىنا ايىرا وتىرىپ، 3,5 جىلدان 7 جىلعا دەيىن باس بوستاندىعىنان ايىرۋعا جانە 4 كومەكتەسۋشى مەملەكەتتىك قىزمەت اتقارۋ قۇقىعىنان 10 جىلعا ايىرا وتىرىپ 2 جىل 6 ايعا باس بوستاندىعىنان ايىرۋعا سوتتالدى.
قىلمىستىق ءىس بويىنشا 6,7 ميلليون تەڭگە كەلتىرىلگەن شىعىن وتەلدى.
ۇكىم زاڭدى كۇشىنە ەنگەن جوق.
