جامبىل وبلىستىق كوپبەيىندى اۋرۋحاناسىنا - 150 جىل

تارازدا جامبىل وبلىسىنىڭ ەڭ كونە مەديتسينالىق مەكەمەسى - قالا ورتالىعىنداعى ايتيەۆ كوشەسىندە ورنالاسقان وبلىستىق اۋرۋحانا 1873 -جىلدان باستاپ جۇمىس ىستەپ كەلەدى.

بۇگىندە «جامبىل وبلىستىق كوپبەيىندى اۋرۋحانا» ش ج ق م ق ك - بۇل تاۋلىك بويى شۇعىل جانە جوسپارلى ستاتسيونارلىق، بىلىكتى مامانداندىرىلعان جانە جوعارى تەحنولوگيالىق مەديتسينالىق كومەك، ەمدەۋ- دياگنوستيكالىق جانە پروفيلاكتيكالىق قىزمەت كورسەتەتىن ەمدەۋ مەكەمەسى. زاماناۋي ەمحانانىڭ 385 توسەك- ورىنعا ارنالعان 12 بولىمشەسى بار.

ال 150 جىل بۇرىن بۇل 1873 -جىلى اۋليە اتا ۋەزىندە ءبىرىنشى بولىپ اشىلعان ەمدەۋ مەكەمەسىندەگى «قابىلداۋ ءبولىمى» عانا ەدى. جالعا الىنعان شاعىن بولمەدە ەمدەلۋگە ارنالعان نەبارى التى توسەك- ورىن بولعان. ناۋقاستاردى ءۇش ادام - دارىگەر، فەلدشەر جانە ەكپە جاسايتىن اجەي قابىلدادى.

ⅩⅩ عاسىردىڭ 20-جىلدارى، اشتىق جانە ەپيدەميامەن كۇرەس جۇرگىزۋدىڭ اۋىر جاعدايىندا جاس كەڭەس رەسپۋبليكاسىنىڭ مەديتسينالىق قىزمەتى قۇرىلىپ، نىعايدى.

ونىڭ ماقساتى اۋليە اتا ۋەزىندەگى (جامبىل وبلىسىنىڭ سول كەزدەگى اتاۋى) تۇرعىندار ءۇشىن جالپىعا ورتاق جانە تەگىن مەديتسينالىق قىزمەت كورسەتۋ ەدى.

ءبىراق سول كەزدە اۋرۋحانا، ءدارىحانا، دەنساۋلىق ورتالىقتارى، دارىگەر، فەلدشەر، اكۋشەر، جابدىقتار، ءدارى-دارمەك - ءبارى تاپشى بولعان.

ارحيۆ دەرەكتەرى بويىنشا، 1920 -جىلى مەديتسينالىق كومەكتى جەتى دارىگەر، 34 فەلدشەر مەن دارىگەر كومەكشىلەرى، توعىز اكۋشەر ايەل، ءبىر ءتىس دارىگەرى، ءبىر مەيىربيكە، ءبىر پروۆيزور جانە ەكى فارماتسيەۆت كورسەتكەن. ەمدەۋ مەكەمەلەرى ۋەز اۋىلدارىندا دا اشىلىپ، ەمدەلۋگە ارنالعان توسەك-ورىن سانى 180 گە دەيىن كوبەيدى.

وبلىستىق دەنساۋلىق ساقتاۋ باسقارماسىنان بايانداپ بەرگەندەي، جامبىل وبلىستىق اۋرۋحاناسى جانىنداعى حيرۋرگيا ءبولىمىنىڭ حالىققا قىزمەت ەتىپ جاتقانىنا 100 جىلدان استى. وبلىستىڭ العاشقى حيرۋرگى يۆان نيكولوۆيچ پرومونتوۆ اۋليە اتا قالالىق اۋرۋحاناسىندا 1921-1938 -جىلدارى قىزمەت ەتىپ، حالىققا مەديتسينالىق كومەك كورسەتۋ، باسپاناسىزدىق پەن تۇرعىنداردىڭ تاماقتانۋىن جاقسارتۋدى ۇيىمداستىرۋ جۇمىستارىنا بەلسەنە اتسالىستى. ي. ن. پرومونتوۆ - مەديتسينا كادرلارىن دايارلاپ، جامبىل وبلىسى حيرۋرگيالىق قىزمەتىنىڭ دامۋىندا جارقىن ءىزىن قالدىرعان ادام.

قالانىڭ بايىرعى تۇرعىندارى ونى تاماشا مامان، مەيىرىمدى، كۇش-جىگەرى مول، حالىق دەنساۋلىعىن ساقتاۋ ىسىندە كوپ جۇمىس اتقارعان تۇلعا رەتىندە ەسكە الادى.

1939 -جىلى اۋليە اتا ۋەزى جامبىل وبلىسى بولىپ وزگەرتىلدى. مىنە، سول ۋاقىتتان بەرى وبلىستىق اۋرۋحانا دامىپ، كەڭەيىپ كەلەدى. ەمدەۋ مەكەمەسىنىڭ ماتەريالدىق- تەحنيكالىق بازاسى نىعايىپ، كوپتەگەن بولىمشەلەر ءوز زامانىنا ساي زاماناۋي مەديتسينالىق اپپاراتۋرامەن جابدىقتالدى.

وبلىس ورتالىعىنىڭ اۋماعىندا وبلىستىق اۋرۋحانانىڭ جاڭا عيماراتتارى مەن كورپۋستارى - تەراپيەۆتىك جانە حيرۋرگيالىق كورپۋستار، كونسۋلتاتيۆتىك ەمحانا، وفتالمولوگيالىق ورتالىق جانە ت. ب. سالىندى. مۇندا كۇردەلى وتالار جاساپ، سول جىلدارى مەديتسينا جەتىستىكتەرىن ءوز تاجىريبەسىنە ەنگىزگەن جوعارى بىلىكتى ماماندار ەڭبەك ەتتى.

قازاقستان رەسپۋبليكاسىنىڭ تاۋەلسىزدىك جىلدارىندا جامبىل وبلىستىق اۋرۋحاناسى وڭىردەگى ەڭ ءىرى مەديتسينالىق كەشەنگە اينالدى. بۇگىندە ول ءۇش عيماراتتان تۇرادى - وبلىستىق اۋرۋحانا عيماراتى، ونكولوگيا جانە وبلىستىق پەريناتالدىق ورتالىق. 27 بولىمشەدە 1190 قىزمەتكەر جۇمىس ىستەيدى. بۇل كارديولوگيا، كارديوحيرۋرگيا، ريەۆماتولوگيا، گەماتولوگيا، ەندوكرينولوگيا، قان تامىرلارى حيرۋرگياسى، پروكتولوگيا، نەوناتولوگيا، حيرۋرگيا، جۇكتىلىك پاتولوگياسى، جالپى حيرۋرگيا جانە ت. ب. جىل سايىن ونداعان مىڭ پاتسيەنتكە مەديتسينالىق كومەك كورسەتىلۋدە.

لابوراتوريالىق زەرتتەۋلەردىڭ زاماناۋي ادىستەرى تولىعىمەن اۆتوماتتاندىرىلعان، تسيفرلانعان جانە كومپيۋتەرلەنگەن. بۇل بيوحيميالىق زەرتتەۋلەردىڭ ناتيجەلەرىن Damumed جۇيەسى ارقىلى ەلەكتروندى تۇردە تىكەلەي بولىمشەگە، ەمدەۋشى دارىگەرگە جىبەرۋگە مۇمكىندىك بەرىپ وتىر. زاماناۋي قۇرال-جابدىقتار ادام فاكتورىن جانە اقپارات سۇراۋدىڭ اۋرە-سارساڭىن جويدى.

ناۋقاستىڭ ءبىر قان اناليزىنەن 22 ءتۇرلى بيوحيميالىق زەرتتەۋلەر جۇرگىزىلەدى. بۇل دارىگەرگە Damumed جۇيەسى ارقىلى ءوز كومپيۋتەرىندە ناۋقاستى ەمدەۋدىڭ تولىق سەنىمدى كورسەتكىشتەرىن الۋعا مۇمكىندىك بەرەدى. بولىمشەگە اۋىر حالدە تۇسكەن ناۋقاستاردىڭ قان تالداۋ ناتيجەلەرى جارتى ساعاتتىڭ ىشىندە دايىن بولادى.

وبلىستىق اۋرۋحانا اۋقىمدى عىلىمي-زەرتتەۋ جۇمىستارىن جۇرگىزىپ، عىلىمي جانە عىلىمي- تاجىريبەلىك كونفەرەنتسيالار مەن سەمينارلار ۇيىمداستىرادى. جىل سايىن دارىگەرلەر مەن فەلدشەرلەر مامانداندىرۋ جانە بىلىكتىلىگىن ارتتىرۋ كۋرستارىنان وتەدى. وبلىستىق اۋرۋحانا دارىگەرلەرى دەنساۋلىق ساقتاۋ سالاسىندا جۇمىس ىستەي وتىرىپ، مەديتسينا ماماندىعى بويىنشا ديسسەرتاتسيالارىن قورعاي الدى. بۇل مەديتسينا عىلىمدارىنىڭ دوكتورى، پروفەسسور ساعىندىق وردابەكوۆ، مەديتسينا عىلىمدارىنىڭ كانديداتتارى ءابۋتالىپ ءاشىروۆ، ايگۇل تۇرعىنبايەۆا، ساعي بەيسەنبەكوۆ.

وبلىستىق اۋرۋحانانىڭ كوپتەگەن قىزمەتكەرلەرىن جوعارى كاسىبيلىك پەن تەكتىلىك ەرەكشەلەيدى. اعا دارىگەرلەر: حيرۋرگتار مۇقىشيەۆ ن. ۋ. ، پاك ن. ر. ، وۆسياننيكوۆ ا. س. ، كونستانتينوۆا ە. ل. ، تەراپيەۆتتەر پونومارەنكو ە. ا. ، يتكينا گ. ي. ، اكۋشەر- گينەكولوگ گالەيەۆا ا. ش. ، اۋرۋحانانىڭ باس مەدبيكەسى بورودينا ز. د. رەسپۋبليكانىڭ ەڭبەك سىڭىرگەن مەديتسينا قىزمەتكەرى اتانعان. وبلىستىڭ مەديتسينا قاۋىمى ولاردىڭ ەسىمدەرىن ماقتان تۇتادى.

ۇجىمدى ءار جىلدارى باسقارعان اۋرۋحانانىڭ باس دارىگەرلەرى نيكولاي رومانوۆيچ پاك، نادەجدا فەدوروۆنا رۋزاۆينا، تۇرار سەيدۋمانوۆ، ءازىمحان راحىم ۇلى قاينازاروۆ، الەكسەي سەمەنوۆيچ وۆسياننيكوۆ، سەيىتحان ​​ابديەۆ، ساعي زۋلفۋحار ۇلى بەيسەنبەكوۆتەر جامبىل وبلىسىنىڭ مەديتسينالىق قىزمەتىن جاقسارتۋ جولىندا كوپ ەڭبەك ءسىڭىردى. قازىرگى تاڭدا جامبىل وبلىستىق اۋرۋحاناسىنىڭ ۇجىمىن اباي قۇرالبەك ۇلى نۇرجانوۆ باسقارادى.

2020 -جىلى ەلدى كوروناۆيرۋس ىندەتى جايلاعان كەزەڭدە جامبىل وبلىستىق كوپبەيىندى اۋرۋحاناسى اۋىر ۆيرۋس تۇرىنە شالدىققان ناۋقاستاردى ەمدەۋگە بەيىمدەلدى.

اۋرۋحانا ۇجىمى بىلىكتىلىگىن ۇنەمى ارتتىرىپ، دارىگەرلەر شەتەلدىك جەتەكشى كلينيكالاردا تاعىلىمدامادان ءوتىپ، يننوۆاتسيالىق ەمدەۋ ادىستەرىن ءوز تاجىريبەسىنە ەنگىزىپ، جوعارى تەحنولوگيالىق مەديتسينالىق قىزمەت كورسەتەدى. وبلىستاعى ەڭ ءىرى مەديتسينالىق مەكەمە بۇگىندە جۇرەك- قان تامىرلارى اۋرۋلارىن ەمدەۋ مەن حيرۋرگيالىق وتالاردىڭ ساپاسى مەن ءساتتى ءوتۋى بويىنشا الدىڭعى ورىن الىپ كەلەدى.

اۆتور

زارينا تۋعانبايەۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى