جاڭادان اشىلعان ءىرى كەن ورىندارىنىڭ 50 پايىزدان كوبى مەملەكەتكە تيەسىلى بولادى - ءماجىلىس
استانا. KAZINFORM - بۇدان بىلاي يگەرىلەتىن ءىرى كەن ورىندارىنىڭ نەگىزگى بولىگى مەملەكەتتىڭ قولىندا بولادى. ءماجىلىستىڭ جالپى وتىرىسىندا پالاتا ءتوراعاسى ەرلان قوشانوۆ وسىنداي مالىمەت كەلتىردى.
- سوڭعى جىلدارى قابىلدانعان بارلىق زاڭعا پرەزيدەنتتىڭ «ادىلەتتىلىك يدەياسى» ارقاۋ بولعانىن اتاپ وتكەن ءجون. جەردىڭ استىنداعى جانە ۇستىندەگى قازىنا-بايلىق حالىقتىڭ مەنشىگى دەگەن نورمانى كونستيتۋتسياعا شەگەلەپ جازدىق. قازىر بۇل پرينتسيپ «ۇلتتىق قور - بالالارعا» زاڭى ارقىلى جۇزەگە اسىرىلىپ جاتىر. بۇدان بولەك، جاڭادان اشىلعان ءىرى كەن ورىندارىنىڭ 50 پايىزدان كوبى مەملەكەتكە تيەسىلى بولادى، - دەدى ول.
ءماجىلىس سپيكەرى پرەزيدەنتتىڭ تىكەلەي پارمەنىمەن زاڭسىز الىنعان اكتيۆتەردى قايتارۋ تۋرالى زاڭ قابىلدانعانىن ەسكە سالدى.
- سونىڭ ناتيجەسىندە ەكى تريلليون تەڭگەگە جۋىق اكتيۆ ەلگە قايتارىلدى. وسىنىڭ ءبارى - پرەزيدەنت رەفورمالارىنىڭ جەمىسى. تاريحي ادىلەتتىلىكتى قالپىنا كەلتىرۋگە باعىتتالعان باتىل قادامدار، - دەدى ەرلان قوشانوۆ.
بۇعان دەيىن پرەمەر- مينيستر ولجاس بەكتەنوۆ ۇكىمەتتىڭ رەسمي سايتىنا «ىلگەرىلەۋگە باستاعان التى جىل: قازاقستان ورنىقتى دامۋ جولىندا» ماقالاسىن جاريالاعان ەدى.
