جاڭا زاڭ جوباسى: تۇتىنۋشى ەندى بىردەن سوتقا جۇگىنە الاتىن بولادى
استانا. KAZINFORM - تۇتىنۋشىلاردىڭ قۇقىعىن قورعاۋ تۋرالى جاڭا زاڭ مەديتسينا، تۋريزم، كولىك، بايلانىس سالاسىنداعى قىزمەتتەردى دە رەتتەيتىن بولادى.
بۇل تۋرالى ق ر س ي م تۇتىنۋشىلاردىڭ قۇقىقتارىن قورعاۋ كوميتەتى ءتوراعاسىنىڭ ورىنباسارى سەرىك قۇسايىنوۆ ايتتى.
- 2023-جىلدىڭ قىركۇيەك ايىنان باستاپ ق ر پارلامەنتى ماجىلىسىندە تۇتىنۋشىلاردىڭ قۇقىعىن قورعاۋ تۋرالى زاڭ جوباسى جاڭا رەداكسيادا قارالىپ جاتىر. وندا قازىرگى تاڭدا قولدانىلاتىن زاڭعا قاراعاندا ءبىرشاما وزگەرىس بار. بىرىنشىدەن، قازىرگى زاڭ بويىنشا تۇتىنۋشى قۇقىعىن قورعاۋ ءۇشىن شاعىمدانۋدىڭ 4 ساتىسىنان ءوتۋى كەرەك. ول اتا زاڭعا قايشى. ءبىز ەڭ بىرىنشە سول ولقىلىقتى الىپ تاستادىق، - دەدى ول «تۇتىنۋشىلاردىڭ قۇقىقتارىن قورعاۋ: بيزنەس، مەملەكەت جانە قوعام ديالوگى» اتتى فورۋمدا.
سپيكەردىڭ ايتۋىنشا، وسىلايشا تۇتىنۋشىلاردىڭ قۇقىعىن قورعاۋدىڭ بىرنەشە ساتىلى الگوريتمى جويىلىپ، ادام بىردەن سوتقا جۇگىنە الاتىن بولادى. سونداي-اق جاڭا زاڭ بۇرىن قامتىماعان سالالارعا دا قۇزىرەتى جايىلاتىن بولادى.
- قازىرگى زاڭ بولشەك ساۋدا، ەلەكتروندىق ساۋدا جانە جاي تۇرمىستىق قىزمەتتەر كورسەتۋ كەزىندە تۇتىنۋشىنىڭ قۇقىعىن قورعايدى. الايدا مەديتسينا، تۋريزم، كولىك، بايلانىس قىزمەتتەرىن كورسەتكەن كەزدە بۇل زاڭ ادامداردىڭ قۇقىعىن قورعاي المايدى. بۇل سالالار باسقا زاڭدارمەن قورعالادى. بولاشاقتا قابىلداناتىن زاڭدا ءبىز بۇل ولقىلىقتى جويامىز. زاڭ قابىلدانعان سوڭ ءبىزدىڭ مەملەكەتتىك ورگان وسى ايتىلعان قىزمەتتەر بويىنشا تۇتىنۋشىلاردىڭ قۇقىقتارىن قورعاي الاتىن بولادى، - دەدى سەرىك قۇسايىنوۆ.
كوميتەت ءتوراعاسىنىڭ ورىنباسارى جاڭا زاڭنىڭ تەك ءبىر سالادا كۇشى جۇرمەيتىنىن اتاپ ءوتتى. ول - قارجى قىزمەتتەرىنە قاتىستى. سەبەبى بۇل سالاعا جاۋاپتى وزگە مەملەكەتتىك ورگان - قارجى نارىعىن رەتتەۋ جانە دامىتۋ اگەنتتىگى بار.
ايتا كەتەيىك، بۇعان دەيىن تۇتىنۋشىلار قاي سالادا كوپ شاعىم تۇسىرەتىنى جايلى جازعان ەدىك.
