جاڭا تۋعان بۇزاۋلاردى جەپ جۇرگەن قاسقىر اڭشىنىڭ وعىنا ۇشتى

- دالادا سيىردىڭ تۋىپ كەتكەن بۇزاۋىن جەپ تىنشىتپاي جۇرگەن قاسقىر ەدى. وسىنى العاسىن ەل تىنىش بولدى. الدابەردى اتاي قوي- سيىرعا شاۋىپ، مالشىلارعا مازا بەرمەگەن كوكجالدى قاقپانمەن ۇستاپتى. سەكسەننىڭ سەڭگىرىنەن اسقان اۋىل تۇرعىنى اڭشىلىق قۇرۋعا اقشا قاردىڭ ءتۇسۋىن كۇتىپ ءجۇر. بۇل ونەر وعان اكەدەن دارىعان. العاش 10 جاسىندا تۇلكى مەن قاراقۇيرىقتى قانجىعاسىنا بايلاپتى. كەيىن بىتىرا مىلتىقپەن قاسقىر الا باستايدى. سول ۋاقىتتا ۇستاعان دالا اڭىنىڭ ەتىن اۋىلداستارىنا تەڭدەي ءبولىپ بەرىپتى.

الدابەردى اقشابايەۆ، اڭشى:

- نەنى دە كورگەنبىز، اشتىقتىڭ شەت جاعاسىن. ۇن جوق. ول باسشىلارعا كەلەدى دە، جانۇيالارعا ءبولىنىپ بەرىلەدى. بيدايىن بەرىگەرەكتە، 54-تەن باستاپ بەردى. كوجە جاساپ، سونى تالعاجاۋ قىلاتىن. قاقپان قۇرامىز مىسالى قاراقۇيرىق، قويانعا، ءتىپتى قاراباۋىر دەيتىن قۇس بار. جۇمىرتقا سالادى. وعان دا قاقپان قۇرامىز. اڭشىنىڭ قاقپانى بولادى، قاندىقاقپان دەيتىن. ءبىرىنشى قۇرىلاتىن قاقپاندارىم وسىلار.

قارت اڭشى قاقپاندى شەبەر ءارى جىلدام قۇرادى. ايتۋىنشا، كوكجال جۇرەتىن جولعا قاقپان تاستاۋ وتە ەپتىلىكتى قاجەت ەتەدى. ءبورى ادامنىڭ ءيىسىن سەزسە، قايتىپ ول جەرگە جولامايدى ەكەن. الدابەردى قاريا سوڭعى ءۇش جىلدا ەلۋدەن اسا ءبورى ۇستاعان. بۇرىن ەل اۋماعىنا ءوتىپ كەتكەن گيەنانى قولعا ءتۇسىرىپ، ەلگە تانىمال بولعان.

ەسقۋات اجماعانبەتوۆ، جارمىش اۋىلىنىڭ تۇرعىنى:

- ول دەيتىن ءبىرتۇرلى اڭ. الدى بيىك، ارتى الاسالاۋ. سوسىن جالى بار. موينى ارقالىعىمەن بىرگە بىتكەن، ۇستاعانىن جىقپاي قويمايتىن سونداي كۇشتى كورىنەدى. جىرتقىش اڭ وسى قازاقستانعا كەلىپ، ءۇستىرتتىڭ ۇستىندە جىلقىنى قويماي، سونى وسى الدابەردى قاقپان قۇرۋ ارقىلى ۇستادى. حابارىن ەستىپ بۇل قازاقستاندا جوق اڭ دەپ سوناۋ الماتىدان ادەيى جۋرناليستەر كەلدى.

الدابەردى اتاي اڭشىلىق ونەرمەن قاتار تراكتورشى ماماندىعىن مەڭگەرگەن. زەينەتكە شىققانعا دەيىن اۋىر كولىك تىزگىندەپ، اۋىلدارعا سۋ تاسىعان. بۇگىندە ۇل- قىزىنان تاراعان نەمەرە- شوبەرەنىڭ قىزىعىن قىزىقتاۋدا.

www.24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى