جاڭا ستاندارت: كەيبىر مەكتەپتەردە وقۋ پاندەرى بىرىكتىرىلۋى مۇمكىن
استانا. KAZINFORM - ى. التىنسارين اتىنداعى ۇلتتىق ءبىلىم بەرۋ اكادەمياسىنىڭ ۆيتسە-پرەزيدەنتى رۋسلان قاراتابانوۆ 2026 -جىلى قولدانىسقا ەنەتىن جاڭارتىلعان ءبىلىم ستاندارتى قاي پاندەردى بىرىكتىرىپ وقىتۋعا مۇمكىندىك بەرەتىنىن ايتتى.
- بۇكىل ءپان ورنىندا قالادى. سوندىقتان حيميا، فيزيكا، بيولوگيا نەمەسە ماتەماتيكا پاندەرى جويىلادى دەگەن قورقىنىش بولماۋ كەرەك.
ءبىر جاعىنان كەيبىر پاندەردى بىرىكتىرىپ وقىتقىسى كەلەتىن مەكتەپتەر بار. جاڭا ستاندارت ونداي باستامالارعا رۇقسات بەرەدى. ياعني، ءار مەكتەپتىڭ ىشكى شەشىمىنە بايلانىستى. ءبىر مەكتەپ فيزيكا، بيولوگيا، حيميا سياقتى پاندەردى ءداستۇرلى قالپىندا قالدىرعىسى كەلسە، جاڭا ستاندارت ول جاعىن دا قاراستىرعان. سوعان ساي وقۋ باعدارلاماسىن بەرەدى. ال باسقا ءبىر مەكتەپ كەيبىر پاندەردى بىرىكتىرىپ وقىتقىسى كەلسە، جاڭا ستاندارتتا بىرىكتىرۋگە بولاتىن پاندەردىڭ تىزبەسى بەكىتىلگەن. بىرىكتىرىلگەن پاندەر قالاي اتالاتىنى دا ستاندارتتا كورسەتىلگەن، - دەدى ول وقۋ-اعارتۋ مينيسترلىگىنىڭ القا ماجىلىسىندە.
اكادەميا وكىلى پاندەردى بىرىكتىرۋ مىندەتتى شارا بولمايتىنىن، ءار مەكتەپتىڭ ءوز تاڭداۋىنا بايلانىستى ەكەنىن باسا ايتتى. مىسالى، دۇنيەجۇزى تاريحى مەن قۇقىق نەگىزدەرى الەۋمەتتىك عىلىمدار رەتىندە، الگەبرا مەن گەومەتريا ماتەماتيكا ءپانى رەتىندە بىرىكتىرىلۋى مۇمكىن.
- پاندەردىڭ مازمۇنىنا كەلسەك، جاڭا ستاندارت ونى سونشالىق وزگەرتكەن جوق. نەگىزگى بولىمدەردىڭ ءبارى سول كۇيىندە قالدى. جالعىز ەسكەرەتىن دۇنيە، كەيبىر تاپسىرمالار جاساندى ينتەللەكت مۇمكىندىكتەرىنە قاراي وزگەرتىلەدى. ءبىلىم بەرۋدىڭ مەملەكەتتىك ستاندارتى وزگەرسە، وقۋلىقتاردا دا وزگەرىستەر پايدا بولاتىنى زاڭدىلىق، - دەدى رۋسلان قاراتابانوۆ.
بۇعان دەيىن 2026 -جىلدان باستاپ قاي پاندەرگە جاساندى ينتەللەكت قۇرالدارى ەنگىزىلەتىنى تۋرالى جازعان بولاتىنبىز.
اۆتور
ەسىمجان ناقتىباي
