جاڭا بيۋدجەت كودەكسى: ۇلتتىق قوردىڭ اقشاسى ەكى باعىتقا عانا جۇمسالادى
استانا. KAZINFORM - ءماجىلىس دەپۋتاتتارى بيۋدجەت كودەكسىن ەكىنشى وقىلىمدا قابىلدادى.
پالاتا ءتوراعاسى ەرلان قوشانوۆ دەپۋتاتتار جاڭا كودەكسكە داۋىس بەرگەننەن كەيىن قۇجاتتاعى نەگىزگى نورمالارعا توقتالدى.
- بۇگىن ءبىز وتە ماڭىزدى زاڭ قابىلدادىق. بۇل - ەلىمىزدىڭ قارجى جۇيەسىن رەفورمالاۋ باعىتىنداعى ۇلكەن، ماڭىزدى قادام. بۇگىن سول ماڭىزدى قادامدى جاسادىق. وزدەرىڭىز بىلەسىزدەر، بىلتىر پرەزيدەنت الدىمىزعا جاڭا ەكونوميكالىق مودەلگە كوشۋ تۋرالى اۋقىمدى مىندەت قويدى. سونىڭ زاڭنامالىق نەگىزدەمەسىن قالىپتاستىرىپ جاتىرمىز. ءقازىر ماجىلىستە سالىق كودەكسى قارالىپ جاتىر. ال بۇگىن جاڭا بيۋدجەت كودەكسىن قابىلداپ جاتىرمىز.
وتكەن اپتادا ەل بيۋدجەتىن قاراعان كەزدە دە بيۋدجەت ساياساتى توڭىرەگىندە قىزۋ پىكىرتالاس بولدى. دەپۋتاتتار ايتقان سىن- ەسكەرتپەلەردىڭ ءبارى بۇگىنگى كودەكستە ەسكەرىلدى، - دەدى ول.
ايتۋىنشا، ۇكىمەتتەن كەلگەن كودەكس جوباسىنا دەپۋتاتتار ءبىراز تۇجىرىمدامالىق وزگەرىستەر ەنگىزگەن كورىنەدى.
- اسىرەسە ۇلتتىق قور قاراجاتىن ءتيىمسىز جۇمساۋ ماسەلەسى ءجيى كوتەرىلگەن بولاتىن. جاڭا بيۋدجەت كودەكسىندە سول قاراجاتتى ناقتى ماقساتتارعا جۇمساۋ جونىندە نورما بەكىتىلدى. ەندى ۇلتتىق قوردىڭ اقشاسى تەك وندىرىسكە نەمەسە ەلدى مەكەندەردىڭ ومىرلىك ماڭىزى بار ينفراقۇرىلىمىنا عانا جۇمسالادى.
بۇدان بولەك كۆازيمەملەكەتتىك سەكتورداعى ديۆيدەنت ساياساتى قايتا قارالدى. بۇل دا كوپ جىلدان بەرى ايتىلىپ جۇرگەن اڭگىمە. ءبىز وسىنى بۇگىنگى بيۋدجەت كودەكسىندە زاڭداستىردىق. «سامۇرىق- قازىنا» قورىنىڭ كەم دەگەندە 50 پايىز تابىسى، ال كۆازيمەملەكەتتىك كومپانيالاردىڭ 70 پايىز تابىسى بيۋدجەتكە اۋدارىلادى. بۇل بۇرىن ۇكىمەت قاۋلىسىمەن بەكىتىلىپ كەلسە، ەندى كودەكسكە ەنگىزىپ وتىرمىز، - دەدى ءماجىلىس ءتوراعاسى.
ەرلان قوشانوۆ جاڭارتىلعان بيۋدجەت پروتسەسىندە 10 جىلعا ارنالعان ۇزاقمەرزىمدى بولجام جاسالاتىنىن اتاپ ءوتتى.
- بۇل ءتاسىل قىسقا مەرزىمگە جانە ۇزاق مەرزىمگە بيۋدجەت شىعىسىن دۇرىس جوسپارلاۋعا، بيۋدجەتتى ءتيىمدى يگەرۋگە مۇمكىندىك بەرەدى. سونىمەن قاتار، ءبىز وڭىرلەردىڭ دەربەستىگىن ودان ءارى ارتتىرا تۇسەمىز. كودەكستە بيۋدجەت كىرىستەرىنىڭ ءبىر بولىگىن رەسپۋبليكالىق دەڭگەيدەن جەرگىلىكتى بيلىك ورگاندارى دەڭگەيىنە بەرۋ شارالارى كوزدەلگەن. مۇنىڭ ءبارى كەلەشەكتە جەرگىلىكتى رەسۋرستاردى ءتيىمدى يگەرۋگە وڭ اسەر ەتەرى ءسوزسىز، - دەدى سپيكەر.
