جاڭا اۆتوموبيلدەردى سىناقتان وتكىزەتىن ورتالىق قۇرىلادى
قازاقستاندا قۇراستىرىلاتىن جانە يمپورتتالاتىن اۆتوموبيلدەردى سەرتيفيكاتتاۋ ءۇشىن تولىققاندى سىناق ورتالىعىن قۇرۋ ماسەلەسى پىسىقتالىپ جاتىر. بۇل جايىندا ءماجىلىس دەپۋتاتتارىنىڭ ساۋالىنا پرەمەر-ءمينيستردىڭ ءبىرىنشى ورىنباسارى رومان سكلياردىڭ جاۋابىندا ايتىلعان، دەپ حابارلايدى Kazinform.
«قازاقستاندىق كاسىپورىندار ەۋروپالىق سەرتيفيكاتتاۋ ورتالىقتارىمەن بىرلەسىپ، قازاقستاندا قۇراستىرىلاتىن جانە يمپورتتالاتىن اۆتوموبيلدەردى سەرتيفيكاتتاۋ ءۇشىن تولىققاندى سىناق ورتالىعىن قۇرۋ ماسەلەسىن قاراستىرىپ جاتىر. سىناق ورتالىعىن قۇرۋ كولىك قۇرالدارىن سەرتيفيكاتتاۋ، جول- پوليگون، كليماتتىق، ستەندتىك جانە باسقا دا زەرتحانالىق سىناقتاردى جۇزەگە اسىرۋدى كوزدەيدى»، - دەدى رومان سكليار جاۋابىندا.
ونىڭ اتاپ وتۋىنشە، قازىرگى ۋاقىتتا وسى جوبانى قارجىلاندىرۋ ماسەلەلەرى پىسىقتالىپ جاتىر.
«سونداي-اق موراتوريدى ەنگىزۋ بويىنشا قابىلدانعان ءىس-شارالار شەتەلدىك وندىرۋشىلەردىڭ دايىن اۆتوكولىك قۇرالدارى مەن ماشينا جيىنتىقتارىن قازاقستان نارىعىنا جەتكىزۋدى ۇزدىكسىز جۇزەگە اسىرۋعا مۇمكىندىك بەرگەنىن جانە كولىك قۇرالدارىنىڭ تاپشىلىعىنىڭ تۋىنداۋ مۇمكىندىگىن جوققا شىعارعانىن اتاپ وتەمىز. وسىلايشا، شۇعىل جانە جەدەل قىزمەتتەردى شاقىرۋ جۇيەسىمەن جابدىقتاۋ بويىنشا موراتوريدىڭ قولدانىلۋىن توقتاتۋ ءجونسىز دەپ سانايمىز»، - دەدى ول.
