مەملەكەت باسشىسى تۇركى ەلدەرىنە IT كومپانيالاردىڭ ىنتىماقتاستىعىن كۇشەيتۋدى ۇسىندى
«قازىر الەم حالقىنىڭ سانى 8 ميللياردقا جۋىقتادى. ونىڭ 55 پايىزى قالادا تۇرادى. بىرىككەن ۇلتتار ۇيىمىنىڭ بولجامى بويىنشا 2050 -جىلعا قاراي جەر بەتىندەگى قالا حالقىنىڭ ۇلەسى 68 پايىزعا جەتەدى. جىل وتكەن سايىن قالالىق جەردە كورسەتىلەتىن قىزمەتكە سۇرانىس ارتىپ كەلەدى»، - دەدى قاسىم- جومارت توقايەۆ تۇركى مەملەكەتتەرى ۇيىمىنىڭ سامميتىندە.
وسى ورايدا مەملەكەت باسشىسى جاھاندىق ىندەت مۇنداي قىزمەتتى قاشىقتان جۇرگىزۋگە بولاتىنىن كورسەتكەىنىن اتاپ ءوتتى.
«قازاقستاندا اقىلدى قالا جۇيەسى ەنگىزىلىپ، ءبىرقاتار جوبا تابىستى جۇزەگە اسىرىلۋدا. سونىڭ ارقاسىندا جول- كولىك وقيعالارى مەن اپات سالدارىنان بولاتىن ءولىم- ءجىتىم 60 پايىزعا ازايدى. قوعامدىق ورىنداردا جاسالعان قىلمىس سانى 70 پايىزعا كەمىدى. ال، سالىق ءتۇسىمى بىرنەشە ەسە ارتتى. قازاقستان سيفرلاندىرۋ جونىندەگى ۇلتتىق جوبانى قابىلدادى. بۇل جوبا قالالاردى باسقارۋ ىسىنە وزىق تەحنولوگيا ەنگىزۋدى كوزدەيدى. اقىلدى قالا جوبالارى اياسىندا IT - كومپانيالاردىڭ ىنتىماقتاستىعىن كۇشەيتە ءتۇسۋىمىز كەرەك. بۇل ءبىزدىڭ ەلدەرىمىزدىڭ ەكونوميكاسىن وركەندەتۋگە دە سەپتىگىن تيگىزەرى انىق. قازاقستان اقىلدى قالا جۇيەسىن قۇرۋ ىسىندەگى تسيفرلىق جەتىستىكتەرىن ەكسپورتتاۋعا جانە تاجىريبە بولىسۋگە دايىن»، - دەدى پرەزيدەنت.
بۇدان بۇرىن حابارلانعانداي، «تۇركى تىلدەس مەملەكەتتەردىڭ ىنتىماقتاستىق كەڭەسى» ەندى «تۇركى مەملەكەتتەرى ۇيىمى» دەپ اتالدى.
