«حەزبوللاعا» يزرايلدىڭ ليۆاندا اسكەري وپەراتسيا باستايتىنى جايىندا ەسكەرتىلدى - ب ا ق
استانا. KAZINFORM -سەنبى كۇنى ليۆاننىڭ LBCI ارناسى اراب ەلدەرىنىڭ ءبىرى «حەزبوللاعا» تەل-اۆيۆتىڭ ليۆاندا اۋقىمدى وپەراتسيا باستايتىنىن ەسكەرتكەنىن حابارلادى، دەپ جازدى ارابتىڭ «نابد» جاڭالىقتار پلاتفورماسى.
بۇل جاڭالىق ليۆان ب ا ق- تارىندا يزرايلدىڭ «كان» رەسمي تەلەارناسىنىڭ ليۆانداعى باتىس وكىلىنە سىلتەمەمەن سولتۇستىك مايداندا (يزرايلمەن شەكارادا -رەد.) بىتىمگە كەلۋ ارەكەتتەرىندە ىلگەرىلەۋ جوق دەگەن حابار تاراعان سوڭ پايدا بولدى.
يزرايلدىڭ بايانداماسىنا سايكەس، ليۆاندىق تاراپ ءۇشىن «قازىرگى ۋاقىتتا كەلىسىمنىڭ كىلتى بەيرۋتتە ەمەس، گازادا، ياعني سول جەردە سوعىستى توقتاتۋدا».
يزرايلدىڭ راديوحابار تاراتاتىن كورپوراتسياسى ەكى اپتا بۇرىن نەمىس بارلاۋ قىزمەتى باسشىسىنىڭ ورىنباسارى ولە ديلدىڭ بەيرۋتتە «حەزبوللا» باس حاتشىسىنىڭ ورىنباسارى نايم كاسەممەن كەزدەسۋى تۋرالى حابارلاپ، «كەزەكتەن تىس كەزدەسۋ ەشقانداي ماڭىزدى ناتيجە بەرمەدى، ال نەمىس تاراپى «حەزبوللانى» ليۆان مايدانىن گازا مايدانىنان بولۋگە كوندىرە الماعانىن» اتاپ ءوتتى.
كاسەم كەزدەسۋدە گازاداعى سوعىس اياقتالعانعا دەيىن ليۆان مايدانىندا رەتتەۋ تۋرالى قانداي دا ءبىر يدەيا ايتۋدان باس تارتىپ، نەمىس شەنەۋنىگىن ءيزرايلدىڭ شابۋىلدى توقتاتۋى ءۇشىن وعان قىسىم كورسەتۋگە شاقىردى.
ليۆاننىڭ وڭتۇستىگىندەگى شەكارالىق ايماقتاردا قاۋىپسىزدىك جاعىنان شيەلەنىس ورناعان. يزرايل ارمياسى مەن «حەزبوللا» اراسىنداعى قاقتىعىستار مەن زىمىراندىق شابۋىلدار حاماس 2023 -جىلعى 7-قازاندا «ءال-اقسا تاسقىنى» وپەراتسياسىن باستاپ، يزرايل گازاعا سوعىس جاريالاعالى بەرى بولىپ جاتىر. «حەزبوللانىڭ» باس حاتشىسى «ليۆان مايدانى - گازا سەكتورىن قولدايتىن مايدان» دەپ جاريالادى.
يزرايل ارمياسى ايماقتاعى جاعدايدىڭ شيەلەنىسۋىنە بايلانىستى جاۋىنگەرلىك ازىرلىكتى ارتتىرۋ شارالارى اياسىندا ليۆانمەن شەكارادا قارقىندى وقۋ-جاتتىعۋلار وتكىزەتىنىن جاريالادى.
