چەحيادا ەل تاريحىنداعى ەڭ ءىرى نارازىلىق اكسياسى وتەدى

چەحيا - موراۆيا كاسىپوداقتار كونفەدەراتسياسىنىڭ باسشىسى يوزەف سترشەدۋلى سوزىنشە، بۇل چەحيا تاريحىنداعى ەڭ ءىرى نارازىلىق بولماق.

«قولدا بار دەرەكتەر بويىنشا، 27-قاراشاعا جوسپارلانعان اكسيا چەحيادا وتكەن ەڭ ءىرى قارسىلىق شاراسى بولماق. وعان كاسىپورىن مەن فيرمالاردىڭ 1 ميلليونعا جۋىق جۇمىسشىسى، سونىمەن قاتار باستاۋىش جانە ورتا مەكتەپ قىزمەتكەرىنىڭ %70 ى قاتىسادى. ماقساتى - رەسپۋبليكا ۇكىمەتىن قوعامدا نە بولىپ جاتقانى تۋرالى ويلانۋعا ماجبۇرلەۋ. ەگەر ولار (مينيسترلەر) مۇنداي اكسيانى بايقاماي، قۇتىلىپ كەتۋگە بولادى دەپ ويلاسا، قوعامنىڭ كوڭىل كۇيى ءتىپتى ناشارلاۋى مۇمكىن»، - دەپ ءمالىم ەتتى جۋرناليستەرگە ەلدەگى ەڭ ءىرى كاسىپوداقتار بىرلەستىگىنىڭ كوشباسشىسى.

ولاردىڭ جاقىندا پارلامەنت ماقۇلداپ، پرەزيدەنت قول قويعان مەملەكەت قارجىسىن وڭالتۋعا ارنالعان شارالارعا، ونىڭ ىشىندە مەملەكەتتىك دوتاتسيانى تومەندەتۋ، ءبىرقاتار سالىق جەڭىلدىكتەرىن جويۋ، كەي تاۋار مەن قىزمەت تۇرلەرىنە ققس ارتتىرۋ، زەينەتاقى تولەۋ شارتتارىن وزگەرتۋ جانە باسقا دا قاتاڭ شارالارعا كوڭىلى تولمايدى. كاسىپوداقتار مەن وپپوزيتسيانىڭ پىكىرىنشە، رەفورمالار ينفلياتسيانىڭ كوتەرىلۋىنە اكەپ سوعادى، ەكونوميكانىڭ وسىمىنە كەرى اسەر ەتىپ، ازاماتتاردىڭ ءومىر ساپاسىن تومەندەتەدى.

سونداي-اق ولار مينيسترلەر كابينەتى مۇشەلەرى الەۋمەتتىك ديالوگقا كەلگىسى كەلمەيتىنىن اتاپ ءوتتى.

نارازىلىق جوسپارى بويىنشا، بۇگىن كوپتەگەن كاسىپورىن وندىرىستىك پروتسەستى كەمىندە ءبىر ساعاتقا توقتاتادى. ال ءوندىرىس ءتارتىبى وعان مۇمكىندىك بەرمەيتىن كاسىپورىن جۇمىسشىلارى نارازىلىققا شىققانداردى قولداپ پلاكاتتار ىلەدى. اكسياعا كولىك، تەمىرجولشىلار، ءبىلىم بەرۋ، دەنساۋلىق ساقتاۋ، مادەنيەت، تاماق جانە اعاش وڭدەۋ سالاسى جۇمىسشىلارى قاتىسادى. سونداي-اق اكسياعا قارتتار ءىسى بويىنشا كەڭەس پەن مۇگەدەكتەر ءىسى بويىنشا كەڭەس قولداۋ كورسەتتى.

ميتينگى مەن شەرۋلەر رەسپۋبليكانىڭ بارلىق وڭىرىندە وتەدى.

اۆتور

بالنۇر قوجاگەلدى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى