حوستەلدەگىلەردىڭ قاشىپ شىعۋعا مۇمكىندىكتەرى از بولدى - سىرىم ءشارىپحانوۆ
الماتىدا حوستەلدەن شىققان ءورتتى سوندىرۋگە تار جول، تىنىس الۋعا قيىن ورتا، قالىڭ ءتۇتىن كەدەرگى كەلتىردى.
بۇل تۋرالى توتەنشە جاعدايلار ءمينيسترى سىرىم ءشارىپحانوۆ وڭىرلىك كوممۋكاتسيالار قىزمەتى بريفينگىندە ايتتى، دەپ حابارلايدى Kazinform.
«مۇنىڭ ءبارى ءورتتى سوندىرۋگە، بارلاۋ جۇرگىزۋگە جانە ادامداردى تەز تابۋعا كەدەرگى بولدى. وسىعان قاراماستان، ورتكە قارسى قىزمەت بولىمشەسى ءوز جۇمىسىن ءساتتى ورىندادى. ءورت جەرتولەنىڭ ءدالىز بولمەسىندە بولدى. جەرتولەدە جيناقتالعان ورتوپەديالىق ماتراتستاردىڭ كەسىرىنەن ءورت ءورشي ءتۇستى. شىنىمەن دە، جەرتولەدە بولعانداردىڭ قاشىپ كەتۋگە مۇمكىندىگى وتە از بولدى. ولاردى ءبىزدىڭ ءورت سوندىرۋشىلەر قۇتقاردى»، - دەدى ول.
ول ماتراتستار ورتەنىپ، ءتۇتىن كونتسەنتراتسياسىنىڭ ۇلكەن وشاعى پايدا بولعانىن ايتتى. الايدا ءورت قىسقا مەرزىمدە ءوشىرىلدى.
ت ج م ءمينيسترى سىرىم ءشارىپحانوۆ قازىرگى تاڭدا كوميسسيا مۇشەلەرى ءورتتىڭ سەبەپتەرىن زەرتتەۋگە بەلسەندى كىرىسكەنىن ايتتى. كىنالى جانە جاۋاپتى تۇلعالار انىقتالاتىن بولادى.
«قالا اكىمدىگى باسپاناسىز قالعاندارعا كومەك كورسەتتى. ولار كورشى جاتاقحانالارعا ورنالاستىرىلدى، زارداپ شەككەندەر اۋرۋحاناعا جاتقىزىلدى، ولارعا ءتيىستى مەديتسينالىق كومەك كورسەتىلەدى. جاقىندارىنان ايىرىلعان ادامدار قارالى حاباردى ەستىدى. قازا تاپقانداردىڭ كىم ەكەنى انىقتالدى»، - دەدى ول.
مينيستر حوستەلدە ورنالاسقان ستۋدەنتتەر باسپاناعا مۇقتاج ەكەندەرىن ايتپاعانىن مالىمدەدى.
«ولار اكىمدىككە، وقۋ ورىندارىنا باسپاناعا مۇقتاج ەكەندەرىن، وسى حوستەلدە تۇراتىندارىن حابارلاماعان. ياعني، اتالعان حوستەلدىڭ جۇمىس ىستەيتىنى تۋرالى اكىمدىك تە، باسقا دا مەملەكەتتىك ورگاندار، ونىڭ ىشىندە ت ج دەپارتامەنتىندە دە ەشقانداي اقپارات بولعان جوق»، - دەدى سپيكەر.
وسىعان دەيىن الماتىداعى حوستەلدە ءورت كەزىندە قازا تاپقان قازاقستان ازاماتتارىنىڭ تۋىستارىنا 1 ميلليون تەڭگە كولەمىندە كومەك بەرىلەتىنىن حابارلادىق.
