ايگىلى «Hummer» اۆتوموبيل ماركاسىنىڭ تاريحى

بۇل كولىك ءتۇرىن كۇش پەن ەنەرگيا، ەركىندىك پەن قۋاتپەن تەڭەيدى. 

Hummer كولىگى كوپشىلىكتى قىزىقتىرادى. AM General كومپانياسى جاساپ شىعارعان امەريكالىق ازاماتتىق جول تالعامايتىن تانىمال ماركانىڭ تابىسقا جەتۋ تاريحى قانداي؟

AM General كومپانياسى اسكەري جانە ازاماتتىق باعىتتاعى كولىك قۇرالدارىن شىعارۋعا ماماندانعان. ۋاقىت وتە كەلە ماركانىڭ قۇقىعى General Motors سولتۇستىك امەريكالىق كورپوراتسياعا ساتىلدى. Hummer برەندىنىڭ شىعۋ تاريحى 1979 -جىلدان باستاۋ الادى. ول كەزدە امەريكالىق اسكەريلەر زاماناۋي امبەباپ جول تالعامايتىن كولىك قۇرالىنا مۇقتاج بولدى. كولىك كەز كەلگەن كەدىر-بۇدىر جەردەن وپ-وڭاي ءوتىپ، تۇراقتى، گاباريتى شاعىن جانە اۋە تاسىمالدايتىن قاسيەتكە يە بولۋى ءتيىس ەدى.

جول تالعامايتىن كولىك كەلەسى مامانداندىرىلعان تۇرلەمدەردىڭ نەگىزى بولادى دەپ جوسپارلانعان. بۇل كولىك HMMWV M998 دەگەن كودتىق اتاۋ الدى. كوپتەگەن سىناقتاردان كەيىن، 1983 -جىلى HMMWV M998 امەريكا ارمياسىنىڭ قولدانىسىنا ەنگىزىلدى، ال AM General ءبىر داناسى 20000 دوللار بولاتىن كوتەرمە باعامەن ءدال وسىنداي 55 مىڭ كولىكتى جاساۋ ءۇشىن 5 جىلعا تاپسىرىس الدى.

امەريكالىق ساربازدار قىسقارعان ارىپتەردەن قۇرالعان اتاۋى ءۇشىن جول تالعامايتىن كولىكتى Humvee (حا́مۆي) دەپ اتاپ كەتكەن. ونى جۇرگىزۋ ىڭعايلى ءارى كەز كەلگەن جەردەن وڭاي وتەتىن بولعان، ءتۇرلى ۇلگىدەگى قارۋلار مەن باعىتتار ءۇشىن كوپتەگەن ارنايى تۇرلەنىمدەرگە يە ەدى. ول 20 -عاسىردىڭ سوڭىندا ا ق ش- تاعى ءارتۇرلى ماڭىزدى جاۋىنگەرلىك ارەكەتتەرگە قاتىستى، سول ارقىلى الەمدى مويىنداتا ءبىلدى. بۇل Humvee گە جاڭا ءومىر سىيلاپ، ونىڭ ازاماتتىق تۇرلەنىمىن جاساپ شىعارۋعا ىقپال ەتتى.

پارسى شىعاناعىنداعى اسكەري وپەراتسيالار كەزىندە الەمدەگى بارلىق تەلەارنالار امەريكالىق جول تالعامايتىن كولىكتەردىڭ قۇم توبەلەردە وپ-وڭاي ءجۇرىپ، ساربازدار مەن قارۋ-جاراقتاردى تاسىپ جاتقاندىعىن كورسەتتى. مۇنىڭ بارلىعى شىنايى اسكەري جاعدايدا بولدى. مۇنىڭ بارلىعى كوپتەگەن تەحنيكا اۋەسقويلارعا ۇناي باستادى.

AM General جول تالعامايتىن كولىككە تۇسكەن تاپسىرىستاردىڭ كوپتىگىن، سونىڭ ىشىندە جەكە كومپانيالاردىڭ، اۋقاتتى ادامداردىڭ بەرگەن تاپسىرىستارىن ەسەپكە الا وتىرىپ، ونىڭ ازاماتتىق تۇرلەنىمىن شىعارۋ تۋرالى شەشىم قابىلداعان.

1992 -جىلدىڭ سوڭىندا AM General بۇل كولىكتىڭ جاپپاي ءوندىرىسىن قولعا الىپ، Hummer دەگەن اتپەن ازاماتتىق تۇرلەنىمىن ساتىلىمعا شىعاردى. جول تالعامايتىن كولىكتىڭ العاشقى نۇسقاسى H1 دەگەن اتاۋعا يە بولدى. داۋلەتتى ادامدارعا ارنالعان جاڭا «ويىنشىقتىڭ» باستاپقى باعاسى اسكەري تۇرلەنىمىنەن ءبىر جارىم ەسەگە قىمبات بولىپ، 46-54 مىڭ دوللاردى قۇرادى.

بۇل الەۋەتتى ساتىپ الۋشىلاردى شوشىتتى، سوندىقتان 1992-1993 -جىلدارى 40 مىڭ داناسى عانا ساتىلدى. Hummer اۋەلگى كەزدەن گولليۆۋد جۇلدىزدارىنىڭ اراسىندا تانىمالدىلىققا يە بولدى. جۇلدىزداردىڭ اراسىندا ەڭ العاشقى بولىپ ارنولد شۆارتسەنەگگەر ونىڭ ءبىرىنشى تۇرلەنىمىن، سونداي- اق ودان كەيىنگى بىرنەشە ماركالارىن، سونىڭ ىشىندە سۋمەن جاسايتىن موتورى بار Hummer H2 ءتۇپنۇسقالىق كولىگىن ساتىپ الدى. 

كەيىن كەلە جول تالعامايتىن كولىكتىڭ اتالمىش ماركاسىنىڭ تابىنۋشىلارى توبىنا اكتەر سيلۆەستر ستاللونە، پروديۋسەرلەر ستيۆەن سپيلبەرگ پەن دجوردج لۋكاس قوسىلدى. سونىمەن قاتار، Hummer ءوزىنىڭ ەڭ العاشقى اسكەري ماركاسىنىڭ ارقاسىندا تاياۋ شىعىس، قىتاي جانە ت م د ەلدەرىندە دە قولداۋعا يە بولدى.

ايتا كەتكەن ءجون، Hummer H3 سوڭعى تۇرلەنىمدەرىنىڭ ءبىرىن كالينينگرادتاعى زاۋىتتا جيناعان. ەڭ العاشقى Hummer H1 تۇرلەنىمىنىڭ نەگىزگى ءۇش ۆارياتسياسى بولعان: جۇمساق ورىندىعى بار كۋپە، قاتتى ورىندىعى بار ءتورت ەسىكتى امبەباپ جانە Alpha كۋزوۆىنداعى ۆارياتسيا.

قالعاندارى اسا تانىمال بولا قويماسا دا، ءبىراق سوعان قاراماستان امەريكا اسكەر قۇرىلىمى تاراپىنان جاقسى سۇرانىس تۋدىردى. وسىلايشا، ەكى ەسىكتى پيكاپ نۇسقاسى اۋە شابۋىلداۋىنا قارسى قۇرالدار ءۇشىن نەمەسە اسكەرلەر مەن جۇكتەردى تاسىمالداۋ ءۇشىن شاسسي رەتىندە پايدالانىلدى. ارميادا ارتقى جاعى قيعاشتالعان ءتورت ەسىكتى نۇسقا دا بولدى. ونى slantback دەپ اتادى. ول شىنايى اسكەري Humvee كولىگىنە ۇقساس ەدى.

ونىڭ تەحنيكالىق سيپاتتامالارىنىڭ اراسىندا ءتۇرلى ۇلگىدەگى قوزعالتقىشتارىن اتاپ وتۋگە بولادى. Hummer H1 بولشەكتەرىنىڭ كوپ بولىگى Humvee-دەن قالعان. ولارعا تەجەگىش جۇيەسى مەن جاقتاۋدى، ءوستى جاتقىزۋعا بولادى. ءبىراق، قانداي وزگەرىس بولسا دا، ونىڭ باستى ارتىقشىلىعى - كومپانيا تاڭقالارلىق وتىمدىلىكتى ساقتاپ قالا ءبىلدى. جايلىلىعى ونشا بولماسا دا، Hummer H1 قالعان بارلىق جاعىنان باسەكەلەستەرىن شاڭ قاقتىردى.

Hummer H1 بولسا 2006-جىلعا دەيىن شىعارىلدى. 2000 -جىلى General Motors دەترويتتاعى اۆتوسالوندا Hummer-دىڭ كەلەسى تۇرلەنىمىن تانىستىردى.

اتالمىش مودەلگە H2 بەلگىسى بەرىلدى. ول وتە جايلى، ىشكى ديزاينى مەن ستيلى كوزتارتارلىق ەدى. 325 ل. س. V8 Vortec 6000 قوزعالتقىشىنىڭ، تولىقتاي دانەكەرلەنگەن راماسىنىڭ، جۇرىستىك بولىگىنىڭ كۇشەيتىلگەنىنىڭ، تۇندە كورۋ مۇمكىندىگى جۇيەسىنىڭ ارقاسىندا Hummer H2 ەكسترەمالدى جاعدايدا قولدانۋ ءۇشىن جارامدى ەدى. Hummer H2-نىڭ ماكسيمالدى جىلدامدىعى 160 ك م/ساعاتقا جوعارىلادى.

ا ق ش-تا قولجەتىمدى Hummer H2 جيىنتىقتىلاۋى 49 مىڭ دوللار تۇردى، ال Hummer H1 100 مىڭ دوللاردان استام قارجىنى قۇرايتىن ەدى. 2004 -جىلدىڭ سوڭىندا جۇرتشىلىقتىڭ نازارىنا كوپ كۇتتىرگەن Hummer H3 ۇسىنىلدى. Hummer H3 بولسا 2010- جىلعا دەيىن شىعارىلدى. ونىڭ گاباريتى Hummer H2-مەن سالىستىرعاندا شاعىن بولعانىمەن (ەنى 1,98م.، بيىكتىگى 1,87 م.، ۇزىندىعى 4,80 م. جانە سالماعى 2,2 توننا)، تانىمالدىلىعى مەن فيرمالىق اسكەري ستيلى ساقتالىپ قالدى.

Chevrolet Colorado جانە GMC Canyon تۇرلەندىرىلگەن شاسسيى مەن كولەمى 3,5-5,3 ليتردى قۇرايتىن V-8 بەنزيندىك قوزعالتقىشى Hummer H3-تىڭ نەگىزى سانالدى. 

Hummer H3 قوزعالتقىشى مەن كولەمىنىڭ ارقاسىندا باسقا مودەلدەرگە قاراعاندى الدەقايدا ۇنەمدى بولدى. بۇدان بولەك، Hummer قورشاعان ورتانى قورعاۋعا باسا نازار اۋدارا وتىرىپ، بىرنەشە مودەلدەردى جاساپ شىعاردى. وسىلايشا، جوعارىدا اتاپ وتكەن سۋمەن جۇمىس ىستەيتىن قوزعالتقىشى بار Hummer H2H مودەلىنەن بولەك، 2006 -جىلى لوس-اندجەلەستەگى پەرسپەكتيۆتىك ءوندىرىس كونكۋرسىندا Hummer O2 ءبىرىنشى ورىن يەلەندى.

بۇل تۇرلەنىم اۋانى لاستاماي، ونى كومىرقىشقىل گازىنان تازارتاتىن سيپاتقا يە. كولىكتىڭ شاناق (كۋزوۆ) پانەلى سۋمەن جانە تەڭىز بالدىرلارىمەن تولتىرىلعان، ولار كۇن ساۋلەسىنىڭ كومەگىمەن كومىرقىشقىل گازداردى جاڭقالاپ، وتتەك قوساتىن.

2008 -جىلعى داعدارىستان كەيىن Hummer كولىكتەرىنە دەگەن سۇرانىس ايتارلىقتاي تومەندەپ، General Motors ونىڭ ساتىلىمىنا الاڭدادى. 

2010 -جىلى قىتايدىڭ Sichuan Tengzhong Heavy Industrial Machinery Co كومپانياسىمەن ۇزاق جۇرگىزىلگەن كەلىسسوزدەرىنەن كەيىن ماركانىڭ قۇقىعىن ساتىپ الۋ تۋرالى الدىن الا كەلىسىمگە قول قويىلدى. الايدا، جاڭا ەرتەگى ورىندالماي قالدى. قىتايدىڭ رەسمي ورگاندارىنىڭ كەسىرىنەن كەلىسىمگە قول قويىلمادى. 2010 -جىلدىڭ مامىرىندا سوڭعى Hummer جيناقتالدى، ونى جاساۋعا اتسالىسقان بولىمشەلەر تاراتىلدى. وسىلايشا، ناعىز ەر- ازاماتتار اراسىندا تانىمال بولعان جول تالعامايتىن كولىك ماركالى بار-جوعى 18 جىل ءومىر ءسۇردى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى