حاربيندەگى سايىس كۇنى كوماندامىزبەن ۋلانىپ قالدىق - ەۆگەني كوشكين

Kazinform تىلشىسىنە بەرگەن سۇحباتىندا ەرلەر اراسىندا 100 مەترگە كونكيمەن جۇگىرۋدەن قىسقى ازيا ويىندارىنىڭ كۇمىس جۇلدەگەرى ەۆگەني كوشكين سايىس كۇنى اس-اۋقاتتان ۋلانىپ قالعانىن ايتتى.

- ەلىمىزدىڭ قولداۋىن سەزىندىم. جارىس جاقسى ءوتتى. ءبىراق سايىس كۇنى كوماندامىزدىڭ بىرنەشە ادامى، ونىڭ ىشىندە ءوزىم دە ۋلانىپ قالدىم. سوندىقتان بولار، مەندە 500 مەترگە سايىس ءساتتى شىقپادى. نەدەن ۋلانعانىمىزدى ناقتى بىلمەدىم، ءبىراق جاعدايىمىز اۋىر بولدى. ايتەۋىر جارىس باستالعانشا ەسىمىزدى جيناپ الدىق، - دەدى ول.

سونىمەن قاتار ازيادانىڭ كۇمىس جۇلدەگەرى الداعى ۋاقىتتا الەم كۋبوگىنىڭ 5 جانە 6- كەزەڭدەرىنە، سوسىن الەم چەمپيوناتىنا قاتىسۋدى جوسپارلاپ وتىرعانىن اتاپ ءوتتى. ال جازعى ۋاقىتتا سپورتشى وليمپياداعا دايىندالۋعا نيەتتى.

ەۆگەني كوشكين جارىسقا اتتانعان ۇلتتىق قۇرامانىڭ سپورتتىق فورماسى مەن حاربيندە العان مەدالدىڭ ساپاسىنا بايلانىستى پىكىر ءبىلدىردى.

- سپورتتىق فورمامىزدى العاش كورگەن كەزدە ونىڭ ساپاسى تاڭقالدىردى. وتە ساپالى ءارى حاربين ءۇشىن وتە جىلى بولدى. ال مەدالدىڭ ساپاسىنا كەلسەك، وسى ۋاقىتقا دەيىن ول مەندە قوراپتىڭ ىشىندە بولدى. سوندىقتان ءبىراز ۋاقىتتان كەيىن نە بولارىن بىلمەيمىن. دەگەنمەن، اۋىر ءارى ادەمى، سول سەبەپتى پاريج وليمپياداسىنداعى مەدالداردىڭ «تاعدىرىن» قايتالامايدى دەپ ويلايمىن، - دەدى سپورتشى.

ەسكە سالايىق، بۇعان دەيىن ازيادانىڭ ەكىنشى مەدالىن ەۆگەني كوشكين جەڭىپ العانىن جازعانبىز.

اۆتور

دوسبول اتاجان

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى