حاربين-2025: قازاقستان ءۇشىن ولجاسى از اق ازيادا

بۇلاي دەيتىنىمىز، وسىعان دەيىن قازاقستان ۇلتتىق قۇراماسى قىسقى ازيا ويىندارىندا 6 التىننان كەم الىپ كورمەگەن بولاتىن. مىنە، بيىل تۇڭعىش رەت ەڭ تومەنگى كورسەتكىش كورسەتتىك، قورجىنىمىزعا 4 التىن عانا ءتۇستى.

قىسقى ازيا ويىندارى العاش رەت 1986-جىلى جاپونيانىڭ ساپپورو قالاسىندا ۇيىمداستىرىلعانى بارشامىزعا بەلگىلى. الايدا، ول كەزدە قازاقستان ك س ر و- نىڭ قۇرامىندا بولعاندىقتان، بۇل دودالارعا تاۋەلسىز ەل رەتىندە قاتىسا الماعان ەدى.

قازاقستان قۇراماسى قىسقى ازيا ويىندارىنا تاۋەلسىز ەل رەتىندە 1996-جىلدان باستاپ قاتىسا باستادى. سول جىلداردان بەرى قاراي، وتانداستارىمىز حاربيندى قوسا ەسەپتەگەندە جەتىنشى قىسقى ازيا ويىندارىنا قاتىسىپ وتىر. ەندى، سول ويىنداردىڭ ءارقايسىسىندا قازاقستان قۇراماسى قانداي كورسەتكىشتەرگە قول جەتكىزگەنىنە جەكە-جەكە توقتالىپ وتەيىك.

حاربين - 1996-جىل: (قىتاي)

قازاقستان قۇراماسى قىسقى ازيا ويىندارىنا العاش رەت 1996-جىلى قاتىستى. بۇل دودا دا تۋرا قىتايدىڭ حاربين قالاسىندا وتكەن بولاتىن.

وندا وتانداستارىمىز 14 التىن، 9 كۇمىس، 8 قولا، جالپى 34 جۇلدە جەڭىپ الىپ، جالپىكوماندالىق ەسەپتە جارىس قوجايىندارى قىتايدان 1 عانا التىنعا قالىپ، ەكىنشى ورىنعا يە بولعان ەدى. وسىلايشا، العاشقى ويىندارىندا-اق وزدەرىنىڭ سارىقۇرلىق دوداسىندا كىل مىقتىلار قاتارىنان كورىنە ءبىلدى.

كانۆوندو - 1999-جىل: (وڭتۇستىك كورەيا)

ەل سپورتشىلارى ەكىنشى قىسقى ازيا ويىندارىن 1999-جىلى وڭتۇستىك كورەيانىڭ كانۆون قالاسىندا وتكىزدى. بۇل ويىندار دا قازاق سپورتشىلارى ءۇشىن ءساتتى بولدى دەپ ايتۋعا بولادى.

سەبەبى - وتانداستارىمىز 10 التىن، 8 كۇمىس جانە 7 قولا مەدال جەڭىپ الىپ، جالپى ەسەپتە ءۇشىنشى ورىنعا قول جەتكىزدى. بۇل باسەكەدە قىتاي قۇراماسى 15 التىن، 10 كۇمىس، 11 قولا مەدالمەن كوش باستاسا، ەكىنشى ورىنعا قازاقستان قۇراماسىنان ءبىر عانا التىن ارتىق العان جارىس قوجايىندارى يە بولدى. ولار - 11 التىن، 10 كۇمىس، 14 قولا مەدال جەڭىپ الدى.

اوموري - 2003-جىل: (جاپونيا)

قازاقستان قۇراماسى ءۇشىنشى قىسقى ازيا ويىندارىن 2003-جىلى جاپونيانىڭ اوموري قالاسىندا وتكىزدى. اتالعان جارىستا وتانداستارىمىز جالپىكوماندالىق ەسەپتە تاعى ءبىر ساتىعا تومەندەپ، ءتورتىنشى ورىنعا جايعاستى.

اوموري قالاسىندا وتكەن سارىقۇرلىق سايىسىندا جەرلەستەرىمىزگە 7 التىن، 7 كۇمىس، 6 قولا مەدال بۇيىردى. ناتيجەسىندە ءتورتىنشى ورىنعا يە بولدى. بۇل جولى باس جۇلدەنى 27 التىن، 26 كۇمىس، 23 قولا مەدالعا قول جەتكىزگەن جاپونيالىقتار جەڭىپ الدى. ال ەكىنشى ورىنعا 10 التىن، 8 كۇمىس، 10 قولا جەڭىپ العان وڭتۇستىك كورەيا سپورتشىلارى يە بولدى. ۇزدىك ۇشتىكتى 9 التىن، 11 كۇمىس، 13 قولا مەدالمەن قىتاي قۇراماسى تۇيىندەدى.

چانچۋن - 2007-جىل: (قىتاي)

وتانداستارىمىز ءتورتىنشى قىسقى ازيا ويىندارىن 2007-جىلى قىتايدىڭ چانچۋن قالاسىندا وتكىزدى. ءدال وسى قىسقى ازيا ويىندارىندا جەرلەستەرىمىز وزدەرى قاتىسقان ازيا ويىندارى تاريحىنداعى ەڭ تومەنگى كورسەتكىشكە قول جەتكىزگەن بولاتىن.

ناقتىراق ايتساق، 2007-جىلعى اق ازيادا ويىندارىندا سپورتشىلارىمىز 6 التىن، 6 كۇمىس، 6 قولا مەدالمەن جالپى كوماندالىق ەسەپتە تاعى دا ءتورتىنشى ورىنعا تابان تىرەدى. ءۇشىنشى ورىن العان كورەيالىقتار قازاقستان قۇراماسىنان 3 التىنعا ارتىق يەلەندى. ولار 9 التىن، 13 كۇمىس، 11 قولاعا قول جەتكىزسە، ءبىرىنشى ورىندى جارىس قوجايىندارى يەلەندى. ولار 19 التىن، 19 كۇمىس، 23 قولا مەدالعا قول جەتكىزدى. ال ەكىنشى ورىندى 13 التىن، 9 كۇمىس، 14 قولا مەدالمەن جاپونيا قۇراماسى قانجىعاسىنا بايلادى.

الماتى-استانا - 2011-جىل (قازاقستان)

وتانداستارىمىز ءۇشىن بەسىنشى قىسقى ازيا ويىندارى تاريحي جەتىستىكتەرگە تولى بولدى. ارۋ قالامىز الماتى مەن ەلوردامىز استانا قالاسىندا وتكەن VII قىسقى ازيا ويىندارىندا ەل سپورتشىلارى بىردەن 70 مەدالعا قول جەتكىزدى. ونىڭ 32 ءسى التىن، 21 ءى كۇمىس، ال 17 ءسى قولا مەدال. وسىلايشا، قازاقستاندىقتار ءوز ەلىمىزدە وتكەن دودادا جالپىكوماندالىق ەسەپتە كوش باستاپ، ەل مەرەيىن اسىردى.

VII قىسقى ازيا ويىندارىندا ەكىنشى ورىنعا 13 التىن، 24 كۇمىس، 17 قولا مەدالمەن جاپونيا قۇراماسى جايعاسسا، ۇزدىك ۇشتىكتى وڭتۇستىك كورەيا سپورتشىلارى تۇيىندەدى. ولار 13 التىن، 12 كۇمىس، 13 قولا مەدال جەڭىپ الدى. ال قىتاي قۇراماسى 11 التىن، 10 كۇمىس، 14 قولا مەدالمەن ءتورتىنشى ورىنعا جايعاستى.

وسى ورايدا ايتا كەتەيىك، ازيادا ويىندارىن 2011-جىلى قازاقستان العاش رەت وتكىزدى. جارىستار استانا مەن الماتى قالالارىندا وتكىزىلدى.

ساپپورو - 2017-جىل: (جاپونيا)

ەل سپورتشىلارى التىنشى اق ازيادانى 2017-جىلى جاپونيانىڭ ساپپورو قالاسىندا وتكىزدى. كۇنشىعىس ەلىندە وتكەن سايىس تا قازاق سپورتشىلارى ءۇشىن ءساتتى بولدى دەپ ايتۋعا بولادى.

ولاي دەيتىنىمىز - ساپپورو تورىنەن ەل سپورتشىلارى 32 مەدال جەڭىپ الدى. ونىڭ 9 ى التىن، 11 ءى كۇمىس، 12 ءسى قولا. وسىلايشا جالپىكوماندالىق ەسەپتە ءتورتىنشى ورىندى قانجىعالاپ قايتتى.

جاپونيادا وتكەن كەزەكتى ويىنداردا جالپى ەسەپتە جارىس قوجايىندارى باس جۇلدەنى ەنشىلەدى. ولار 27 التىن، 21 كۇمىس، 26 قولا مەدالعا قول جەتكىزسە، وڭتۇستىك كورەيا سپورتشىلارى 16 التىن، 18 كۇمىس، 16 قولامەن ەكىنشى ورىنعا جايعاستى. ال قىتايلىق سپورتشىلار 12 التىن، 14 كۇمىس، 9 قولا مەدالمەن ۇزدىك ۇشتىكتى تۇيىندەگەن بولاتىن.

حاربين - 2025-جىل: (قىتاي)

مىنە، بۇگىن عانا الاۋى سونگەن حاربين قىسقى ازيا ويىندارىندا قازاقستاندىق سپورتشىلار 4 التىن، 9 كۇمىس، 7 قولا مەدالمەن تاعى دا جالپى ەسەپ بويىنشا ءتورتىنشى ورىنعا تۇراقتادى.

وسىلايشا قىتايدىڭ حاربين قالاسىندا وتكەن IX قىسقى ازيا ويىندارى قازاقستاننىڭ ءوز تاريحىنداعى ەڭ ءساتسىز اياقتالعان ويىن رەتىندە ەستە قالدى. ويتكەنى بۇرىنعى ەڭ تومەن كورسەتكىشىمىز 2007-جىلى تىركەلگەن بولاتىن. ول كەزدە تاعى دا قىتايدىڭ چانچۋن قالاسىندا وتكەن ازيا ويىندارىندا 6 التىن مەدالعا قول جەتكىزگەنبىز. مىنە، بۇگىن تاعى دا قىتايدىڭ تاعى ءبىر قالاسى حاربيندا وتكەن سوڭعى ازيا ويىندارىندا العاش رەت 4 التىن مەدالمەن شەكتەلىپ وتىرمىز.

بۇل جولى قىتايلىق سپورتشىلار ءوز ەلىندە وتكەن ويىنداردىڭ كوشىن باستادى. جارىس قوجايىندارى 32 التىن، 27 كۇمىس، 26 قولا مەدال جەڭىپ الدى. ال 16 التىن، 15 كۇمىس، 14 قولا يەلەنگەن وڭتۇستىك كورەيا سپورتشىلارى ەكىنشى ورىنعا جايعاسسا، ۇزدىك ۇشتىكتى جاپونيا سپورتشىلارى قورىتىندىلادى. ولاردىڭ ەنشىسىندە 10 التىن، 12 كۇمىس، 15 قولا مەدال بار.

حاربين قالاسىندا وتكەن IX قىسقى ازيا ويىندارىندا ۇزدىك ناتيجە كورسەتكەن 5 ەل:

1. قىتاي — 85 (32-27-26)؛

2. وڭتۇستىك كورەيا — 45 (16-15-14)؛

3. جاپونيا — 37 (10-12-15)؛

4. قازاقستان — 20 (4-9-7)؛

5. فيليپپين — 1 (1-0-0)؛

5. وزبەكستان — 1 (1-0-0)

وسىعان دەيىن حابارلاعانىمىزداي، قازاقستان قۇراماسى شورت-ترەكتەن قىسقى ازيا ويىندارىنىڭ چەمپيونى اتاندى.

كەيىنىرەك قازاقستان قورجىنىنا ەكىنشى التىن مەدال ءتۇستى.

بياتلوننان قازاقستان ەرلەر قۇراماسى التىن جانە كۇمىس مەدال ەنشىلەدى.

حوككەيدەن قازاقستان ەرلەر قۇراماسى چەمپيون اتاندى.

اۆتور كۇنسۇلتان وتارباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى