حالىققا قىزمەت كورسەتۋ ورتالىقتارىندا كەزەك كۇتۋ ۋاقىتى 2 ساعاتتان 40 مينۋتقا قىسقارتىلدى
استانا. KAZINFORM - حالىققا قىزمەت كورسەتۋ ورتالىقتارىندا كەزەكتە تۇرۋ ۋاقىتى 120 مينۋتتان 40 مينۋتقا دەيىن قىسقاردى. بۇل تۋرالى ىشكى ىستەر مينيسترلىگىنىڭ باسپا ءسوز حاتشىسى شۇعىلا تۇرلىبەك ايتتى.
- «ح ق ك و قىزمەتكەرلەرىنىڭ ازاماتتاردى قۇجاتتاندىرۋى» جوباسى رەسپۋبليكالىق ماڭىزى بار قالالاردا جانە ەلىمىزدىڭ بارلىق وبلىس ورتالىعىندا جۇزەگە اسىرىلۋدا. 2022 -جىلدان، ياعني جوبا ىسكە قوسىلعان ساتتەن باستاپ، كەزەكتە تۇرۋ ۋاقىتى 120 مينۋتتان 40 مينۋتقا دەيىن قىسقارىپ، قىزمەت الۋشىلاردىڭ سانى ارتتى. جالپى ح ق ك و قىزمەتكەرلەرى 1508346 ادامدى قۇجاتتاندىردى، - دەدى ول ۆەدومستۆونىڭ باسپا ءسوز قىزمەتى الاڭىندا وتكەن بريفينگتە.
ونىڭ اتاپ وتۋىنشە، ءى ءى م دەنساۋلىق ساقتاۋ جانە ادىلەت مينيسترلىكتەرىمەن بىرلەسىپ، 2023 -جىلدىڭ ماۋسىمىنان باستاپ، جاڭا تۋعان نارەستەلەرگە جسن بەرۋ بويىنشا جوبانى ىسكە اسىرىپ جاتىر.
- قازىردىڭ وزىندە 45281 ج س ن بەرىلدى. جوبا جاڭا تۋعان نارەستەلەردى مەملەكەتتىك ورگانداردىڭ بارلىق اقپاراتتىق جۇيەلەرىندە ەسەپكە قويۋعا مۇمكىندىك بەرەدى. بۇل بالالار ساۋداسىنىڭ الدىن الۋعا سەپتىگىن تيگىزەدى. سونداي-اق، ول تۋۋ تۋرالى كۋالىك بەرۋ، انالارعا ارنالعان جاردەماقىلاردى شىعارۋ، بالاباقشالار مەن مەكتەپتەرگە ەسەپكە قويۋ سياقتى مەملەكەتتىك قىزمەتتەردى الۋعا كومەكتەسەدى، - دەدى شۇعىلا تۇرلىبەك.
بۇعان دەيىن 2024 -جىلى پوليتسيا تۇرعىندارعا 12 ميلليون مەملەكەتتىك قىزمەت كورسەتكەنىن جازعان ەدىك.
اۆتور
مارلان جيەمباي
