Google ءدىڭ بۇرىنعى ينجەنەرىنە قىتاي تىڭشىسى دەگەن ايىپ تاعىلدى
استانا. قازاقپارات - Google كومپانياسىنىڭ بۇرىنعى ينجەنەرى تىڭشىلىق جاسادى دەگەن كۇدىككە ءىلىندى. وعان Google دەن جاساندى ينتەللەكت (ج ي) تەحنولوگياسىن ۇرلاپ، قىتايدىڭ ج ي يندۋسترياسىن دامىتۋعا كومەكتەستى دەگەن ايىپ تاعىلىپ وتىر. بۇل تۋرالى سينگاپۋرلىق Lianhe Zaobao باسىلىمى جازدى.
باسىلىمنىڭ حابارلاۋىنشا، ا ق ش ادىلەت مينيسترلىگى 4-اقپان كۇنى Google كومپانياسىنىڭ بۇرىنعى باعدارلاماشى- ينجەنەرى دين لينۆەيگە جاڭا ايىپتار تاعىلعانىن مالىمدەدى. بۇعان دەيىن وعان كوممەرتسيالىق قۇپيالاردى ۇرلاۋ بابى بويىنشا ءتورت ايىپ تاعىلعان بولاتىن. ەندى وعان ەكونوميكالىق تىڭشىلىق جاساۋ بابى بويىنشا جەتى ايىپ جانە كوممەرتسيالىق قۇپيالاردى ۇرلاۋ بابى بويىنشا جەتى ايىپ قوسىلىپ وتىر.
ا ق ش ادىلەت مينيسترلىگىنىڭ دەرەگىنشە، ەگەر قىلمىسى دالەلدەنسە، كوممەرتسيالىق قۇپيانى ۇرلاۋ بويىنشا تاعىلعان ءاربىر ايىپ ءۇشىن ول 10 جىلعا دەيىن باس بوستاندىعىنان ايىرىلىپ، 250 مىڭ ا ق ش دوللارىنا دەيىن ايىپپۇل تولەيدى. ال ەكونوميكالىق تىڭشىلىق بويىنشا تاعىلعان ءاربىر ايىپ ءۇشىن وعان 15 جىلعا دەيىن تۇرمە جازاسى تاعايىندالىپ، 5 ميلليون دوللاردان كەم ەمەس ايىپپۇل سالىنادى.
ايىپتاۋ اكىسىنەن بەلگىلى بولعانداي، Google 2019 -جىلى دين لينۆەيدى باعدارلاماشى- ينجەنەر رەتىندە جۇمىسقا العان. 2022 -جىلدىڭ مامىرىنان 2023 -جىلدىڭ مامىرىنا دەيىن، ول ءوزىنىڭ Google Cloud اككاۋنتىنا 1000 نان استام فايل جۇكتەگەن. فايلداردىڭ اراسىندا Google ءدىڭ قۇپيا كوممەرتسيالىق دەرەكتەرى دە بولعان.
ايىپتاۋ قورىتىندىسىنا سايكەس، دين لينۆەي Google ءدىڭ كوممەرتسيالىق قۇپيالارىن قىتاي ۇكىمەتىنىڭ پايداسىنا اسىرماق نيەتپەن ۇرلاعان. ول Google ءدىڭ سۋپەركومپيۋتەرلىك دەرەك ورتالىقتارىن قىتايعا ج ي مودەلدەرىن جەتكىزۋ ءۇشىن پايدالانۋعا مۇمكىندىك بەرەتىن اپپاراتتىق جانە باعدارلامالىق تەحنولوگيالاردى ۇرلادى دەگەن كۇدىككە ءىلىنىپ وتىر.
بەلگىلى بولعانداي، دين لينۆەي Google دە جۇمىس ىستەپ جۇرگەندە قىتايدىڭ ەكى كومپانياسىمەن جەڭ ۇشىنان جالعاسقان جانە 2022 -جىلدىڭ ماۋسىمىندا بەيجىڭگە ورنالاسقان ستارتاپ كومپانيانىڭ باس تەحنيكالىق ديرەكتورى قىزمەتىن قوسا اتقارعان. 2023 - جىلدىڭ مامىر ايىندا ول شاڭحايدا ءوزىنىڭ ج ي جانە ماشينالىق وقىتۋعا ماماندانعان تەحنولوگيالىق كومپانياسىن قۇرادى.
سونداي-اق ايىپتاۋ قورىتىندىسىندا دين لينۆەيدىڭ قىتاي بيلىگىنىڭ كادرلىق قولداۋ باعدارلاماسىنا ءوتىنىم بەرگەنى دە ايتىلعان. باعدارلاما شەتەلدە عىلىمي- زەرتتەۋ جۇمىستارىمەن اينالىسقان جانە ءوزى يگەرگەن ءبىلىم مەن زەرتتەۋ جەتىستىگىن قىتايعا الا قايتقان عالىمدارعا قارجىلىق قولداۋ كورسەتۋگە باعىتتالعان.
