فيزيكا، گەوگرافيا، حيميا، ءتىل: 2026 -جىلدان باستاپ قاي پاندەرگە جاساندى ينتەللەكت قۇرالدارى ەنگىزىلەدى
استانا. KAZINFORM - ى. التىنسارين اتىنداعى ۇلتتىق ءبىلىم بەرۋ اكادەمياسىنىڭ ۆيتسە-پرەزيدەنتى رۋسلان قاراتابانوۆ 2026 -جىلى قولدانىسقا ەنەتىن جاڭارتىلعان ءبىلىم ستاندارتى مۇعالىمدەردىڭ جۇمىسىن قالاي وزگەرتەتىنىن ايتتى.
- بۇگىن قازاقستاندا ءبىلىم بەرۋدىڭ جاڭا ستاندارتى بەكىتىلگەن. ول 2026 -جىلى اينالىمعا ەنەدى. وسى ستاندارتتا جاساندى ينتەللەكت سياقتى ۋاقىت تالاپتارى ەسكەرىلگەن. بۇل تالاپتار الەمدە دامۋدىڭ نەگىزگى فاكتورىنىڭ ءبىرى بولىپ وتىرعاندىقتان ولاردى ەسكەرمەۋ مۇمكىن ەمەس. ونىڭ ۇستىنە جاساندى ينتەللەكت ءبىرقاتار ماماندىقتى ەڭبەك نارىعىنان ىعىستىرىپ تاستايدى دەگەن قاۋىپ تە بار، - دەدى ول وقۋ-اعارتۋ مينيسترلىگىنىڭ القا ءماجىلىسىنىڭ الدىندا.
ونىڭ سوزىنشە، كەيبىر ماماندىقتان «ارداگەر-ماماندىقتارعا» اينالۋى مۇمكىن.
- جاڭا ماماندىقتار پايدا بولىپ جاتىر. قالاي دەسەك تە جاساندى ينتەللەكت بالالار مەڭگەرىپ شىعۋعا ءتيىس قۇرالدىڭ ءبىرى بولىپ وتىر. سوندىقتان كەز كەلگەن ءپان جاساندى ينتەللەكت بازاسىنداعى قۇرالداردى قولدانا وتىرىپ وقىتىلادى. مىسالى، بيولوگيا، حيميا، فيزيكا پاندەرىندە ۆيرتۋالدى زەرتحانالار قولدانىلادى. ال ءتىل پاندەرىندە اڭگىمەلەسىپ، ديالوگ قۇرۋعا ارنالعان قوسىمشالار قولدانىلادى. گەوگرافيا پانىندە ناۆيگاتسيالىق جۇيەلەر ەنگىزىلەدى. قازىر حالىق گەنەراتيۆتى جاساندى ينتەللەكت تۋرالى عانا ايتىپ ءجۇر. ال ءبىز ءبىلىم بەرۋگە ونىمەن قاتار گەنەراتيۆتى ەمەس جاساندى ينتەللەكتىنى دە قولدانامىز، - دەدى رۋسلان قاراتابانوۆ.
ەسكە سالساق اگروونەركاسىپ سالاسىنا جاساندى ينتەللەكت ەنگىزۋگە گرانت بولىنەتىنى تۋرالى جازعان بولاتىنبىز. سونىمەن قاتار Digital Almaty فورۋمى اياسىندا جاسلان مادييەۆ جاساندى ينتەللەكتىنىڭ قازاقستاندىقتاردىڭ ومىرىنە اسەرى تۋرالى پىكىر بىلدىرگەن ەدى.
اۆتور
ەسىمجان ناقتىباي
