فيليپپيننىڭ ەكس-پرەزيدەنتى العاش رەت حالىقارالىق سوت الدىنا شىقتى
استانا. KAZINFORM - دۋتەرتە العاشقى سوت وتىرىسىنا ۆيدەوبايلانىس ارقىلى قاتىستى. ونى حالىقارالىق قىلمىستىق سوتقا فيليپپين ۇكىمەتى تاپسىرعان، دەپ جازادى BBC.
ونىڭ ادۆوكاتى 79 جاستاعى ساياساتكەردىڭ ناۋقاس ەكەنىن جانە وتىرىسقا قاتىسا المايتىنىن ايتتى. الايدا سۋديانىڭ ايتۋىنشا، سوت دارىگەرى دۋتەرتەنىڭ فيزيكالىق جانە پسيحيكالىق جاعدايى وعان پروتسەسكە تولىق قاتىسۋعا مۇمكىندىك بەرەدى دەگەن قورىتىندىعا كەلدى.
دۋتەرتە پرەزيدەنت كەزىندە ءوز ەلىندەگى سوتسىز ادام ءولتىرۋ ناۋقانى ءۇشىن ادامزاتقا قارسى قىلمىس جاسادى دەپ ايىپتالعان.
ەسىرتكىگە قارسى جاريالاعان سوعىستىڭ ءبىر بولىگى رەتىندە پرەزيدەنت كۇشتەرى ەسىرتكىنىڭ زاڭسىز اينالىمىنا قاتىسى بار دەپ ەسەپتەگەن ادامداردى سوتسىز ءولتىردى. ءتۇرلى مالىمەتتەر بويىنشا 7 مىڭنان 30 مىڭعا دەيىن ادام قازا تاپتى.
رودريگو دۋتەرتە سەيسەنبى، ناۋرىزدىڭ 11 ءى كۇنى حالىقارالىق قىلمىستىق سوتتىڭ سانكسياسى بويىنشا مانيلا حالىقارالىق اۋەجايىنا قونعاننان كەيىن قاماۋعا الىندى. سول جەردەن ونى نيدەرلاندقا الىپ كەتتى.
