فەرمەرلەرگە بەرگەن سۋبسيديانىڭ قايتارىمى ماردىمسىز - ەرلان قوشانوۆ

ءماجىلىس دەپۋتاتتارى جوعارى اۋديتورلىق پالاتانىڭ اگروونەركاسىپ كەشەنىن دامىتۋعا ءبولىنىپ جاتقان سۋبسيديالاردىڭ تيىمدىلىگى تۋرالى اۋديت قورىتىندىسى تۋرالى قاۋلىنى قابىلدادى. داۋىس بەرۋ راسىمىنەن كەيىن ءسوز العان ەرلان قوشانوۆ سۋبسيديا ماسەلەسى داۋىس بەرۋشىلەر تاراپىنان دەپۋتاتتاردىڭ الدىنا ءجيى قويىلاتىنىن ايتتى.

- بۇگىندە اگروونەركاسىپ كەشەنىن قارجىلاندىرۋ كولەمى جىل سايىن ارتىپ كەلە جاتىر. تەك كەيىنگى 5 جىلدىڭ وزىندە سالانى سۋبسيديالاۋعا 2 تريلليون تەڭگەدەن استام قاراجات ءبولىندى. بۇل، ارينە، جاقسى كومەك. ءبىراق وسى قارجىنى يگەرۋ، مەملەكەتتىك قولداۋ كورسەتۋ كەزىندە پروبلەمالىق ماسەلەلەر تۋىنداپ جاتادى. دەپۋتاتتاردىڭ ايماقتارعا ساپارى بارىسىندا وسى ماسەلەلەر ءجيى كوتەرىلەدى. ارىپتەستەر، ءالى كۇنگە دەيىن اۋىل شارۋاشىلىعىنداعى نەگىزگى قاراجات كوزى - مەملەكەتتىك سۋبسيديا ەكەنىن مويىنداۋىمىز كەرەك. سول ارقىلى سالادا وڭ وزگەرىستەر ورىن الىپ جاتىر. ءبىراق سيفرلارعا سۇيەنەر بولساق، سۋبسيديالاردىڭ ناتيجەسى، ەكونوميكاعا قايتارىمى ازىرگە جەتكىلىكسىز، - دەدى ول.

سپيكەردىڭ سوزىنشە، سالانىڭ ىشكى جالپى ونىمدەگى ۇلەسى 14 جىل ىشىندە %4-5 دان اسپاي وتىر.

- سالىنعان ءاربىر سۋبسيديانىڭ، ءاربىر تەڭگەنىڭ ەكونوميكاعا اسەرى ايتارلىقتاي بايقالمايدى. مىسالى، مال شارۋاشىلىعى مەن ەگىنشىلىك كورسەتكىشتەرىنە، ازىق-تۇلىكتىڭ قولجەتىمدىلىگى مەن باعاسىنا اسەر ەتىپ جاتقانى ءالى دە سەزىلمەيدى. بۇل - ۇزاق جىلدان بەرى قوردالانعان ماسەلەلەر. سۋبسيديالار فەرمەرلەردىڭ شىعىنىن وتەۋگە عانا ەمەس، تۇتاستاي اۋىل شارۋاشىلىعىن دامىتۋعا باعىتتالۋى كەرەك. اۋىل شارۋاشىلىعىنا ۇلكەن سەرپىن اكەلۋ ءۇشىن ءبىرىنشى كەزەكتە، عىلىمدى دامىتۋىمىز كەرەك، - دەدى پالاتا ءتوراعاسى.

ايتا كەتەيىك، وسىعان دەيىن ەرلان قوشانوۆ قازاقستان ۇ ق ش ۇ- نىڭ حالىقارالىق ۇيىمدارمەن بايلانىسىن نىعايتۋعا ەرەكشە كوڭىل بولگەنىن اتاپ ءوتتى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى