فرانسيا پرەزيدەنتى: كورشىڭىز تۇراقسىز بولسا، ەكونوميكالىق تۇراقتىلىقتى ساقتاۋ قيىندايدى
قازاقستاندا رەسمي ساپارمەن جۇرگەن فرانسيا پرەزيدەنتى ەممانيۋەل ماكرون Maqsut Narikbayev University ستۋدەنتتەرىنە ءدارىس وقىپ جاتىر، دەپ حابارلايدى Kazinform.
سۇراق-جاۋاپ فورماتىندا ءوتىپ جاتقان ءدارىس كەزىندە فرانسيا باسشىسى مەملەكەتتەر اراسىنداعى قاقتىعىستارعا توقتالىپ، قازاقستاننىڭ وسى تاۋەكەلدەردى قالاي ەڭسەرىپ كەلە جاتقانىنا توقتالدى.
«وسىنداي كەزەڭدە بەيبىتشىلىك پەن ارىپتەستىكتى، حالىقارالىق قۇقىقتى قالاي ساقتاي الامىز؟ بۇگىندە وسىنداي ماسەلەلەر بار ەكەنى ءسوزسىز. كورشىڭىز تۇراقسىز بولسا، ەلدەگى ەكونوميكالىق تۇراقتىلىقتى قالاي ساقتاي الاسىز؟ وتاننىڭ تىنىشتىعىن قالاي ساقتاۋىمىزعا بولادى؟ مۇنداي كەزدە ءبىز ىشكى تۇراقتىلىقتى ساقتاپ، ءوز قۇندىلىقتارىمىزعا مىعىم بولۋىمىز كەرەك. مەنىڭشە، قازاقستان پرەزيدەنتى ءدال سونداي باعىتتا جۇمىس ىستەپ ءجۇر. سول باعىتتاعى جوبالارمەن، وزىندىك كوزقاراسپەن بەلەستەردى باعىندىرىپ جاتىرسىزدار»، - دەدى ەممانيۋەل ماكرون.
ونىڭ ايتۋىنشا، ەلدەر اراسىنداعى قاقتىعىستاردان بولەك كليماتتاعى وزگەرىستەر، سيفرلىق پروبلەمالار دا الەم ءۇشىن وزەكتى. فرانسيا پرەزيدەنتى اتالعان باعىتتاردىڭ ءبارى بويىنشا قازاقستانمەن ارىپتەستىك جالعاسا بەرەتىنىن ايتتى.
سونداي-اق ول ءدارىس كەزىندە تاياۋ شىعىس جانە يزرايل مەن پالەستينا قاقتىعىسى تۋرالى دا پىكىر ءبىلدىردى.
