شىمكەنتتە كوشى-قون زاڭدىلىعىن بۇزعان 80 ازامات ەل اۋماعىنان شىعارىلدى
شىمكەنتتە كوشى-قون زاڭدىلىعىن بۇزعان 80 ازامات ەل اۋماعىنان شىعارىلدى، دەپ حابارلايدى Kazinform.
شىمكەنتتە قازاقستان رەسپۋبليكاسىنا كەلۋ، بولۋ جانە كەتۋ ەرەجەلەرىن بۇزعان 650 شەتەلدىك پەن قازاقستان ازاماتتارى انىقتالىپ، اكىمشىلىك جاۋاپكەرشىلىككە تارتىلدى.
سونىمەن قاتار پوليتسيا دەپارتامەنتىنىڭ قابىلداپ-تاراتۋ ورتالىعىنا جەكە باسىن انىقتايتىن قۇجاتتارى جوق 282 ادام ورنالاستىرىلدى. قازاقستان رەسپۋبليكاسىندا بولۋ ەرەجەلەرىن بۇزعان 460 شەتەلدىككە اكىمشىلىك كودەكستىڭ 517-بابىمەن حاتتاما تولتىرىلدى.
شەتەل ازاماتىن زاڭسىز تۇرعىن ۇيمەن قامتاماسىز ەتكەن 126 شىمكەنتتىك اكىمشىلىك كودەكستىڭ 518-بابىمەن جانە شەتەلدىك جۇمىس كۇشىن زاڭسىز پايدالانعان 64 جەرگىلىكتى تۇرعىن 519-بابىمەن جاۋاپكەرشىلىككە تارتىلدى.
«كوشى-قون باسقارماسىنىڭ قىزمەتكەرلەرى «ميگرانت» جەدەل-پروفيلاكتيكالىق ءىس شاراسىن قورىتىندىلادى. ناتيجەسىندە كوشى-قون زاڭناماسىن ورەسكەل بۇزعان 80 شەتەلدىك قازاقستان رەسپۋبليكاسىنىڭ اۋماعىنان شىعارىلدى»، - دەلىنگەن شىمكەنت قالاسى پوليتسيا دەپارتامەنتىنىڭ باسپا ءسوز قىزمەتى تاراتقان اقپاراتتا.
