شىمكەنتتە كامەلەتكە تولماعاندارعا قارسى جاسالعان قىلمىستار 34,2 پايىزعا ءوستى
شىمكەنت. KAZINFORM - كامەلەت جاسقا تولماعاندارعا قارسى جاسالعان قىلمىستار 152 دەن 204 كە ءوسىپ وتىر. بۇل تۋرالى شىمكەنت قالاسى پروكۋراتۋراسىنىڭ قوعامدىق مۇددەلەردى قورعاۋ باسقارماسىنىڭ باستىعى باقىتجان بايعوزيەۆ مالىمدەدى.
جىل باسىنان بەرى موبيلدىك توپتار 500 دەن استام تۇنگى رەيدتەر جۇرگىزگەن. ناتيجەسىندە 5 مىڭنان استام كامەلەتكە تولماعان جاس انىقتالىپ، ولاردىڭ اتا-انالارى اكىمشىلىك جازاعا تارتىلدى. ال، 600 دەن استام بالا بەيىمدەۋ ورتالىعىنا ورنالاستىرىلدى.
- بيىلعى جىلدىڭ 11 ايىندا كامەلەت جاسقا تولماعاندارمەن جاسالعان قىلمىستار 2,7 پايىزعا تومەندەگەن. دەگەنمەن، كامەلەت جاسقا تولماعاندارعا قارسى جاسالعان قىلمىستار 34,2 پايىزعا ءوسىپ وتىر. بۇل ۇرىپ سوعۋ، ۇرلىق، جول ءجۇرىسى قاعيدالارىن بۇزۋى قىلمىستارىن جاساۋ فاكتىلەرىنىڭ وسۋىمەن تىكەلەي بايلانىستى. كامەلەت جاسقا تولماعاندار جانە ولارعا قارسى جاسالعان قىلمىستىق قۇقىق بۇزۋشىلىقتىڭ الدىن الۋ پروفيلاكتيكاسى بويىنشا قالا پروكۋرورىنىڭ وكىمىمەن 71 موبيلدىك توپ قۇرىلدى. ولار تۇراقتى تۇردە اپتا سايىن تۇنگى رەيدتىك ءىس-شارالاردى جۇرگىزۋدە، - دەدى باقىتجان بايعوزيەۆ.
ايتا كەتەيىك، بۇدان بۇرىن شىمكەنتتە جەكە تۇرعىن ءۇي ورتەنىپ، 52 جاستاعى ايەل قايتىس بولعانىن جازعان بولاتىنبىز.
