شىمكەنتتە جوعالىپ كەتكەن 6 بالا تابىلدى
جوعالعانداردىڭ بارلىعى 15-16 جاستاعى جاسوسپىرىمدەر. ولاردىڭ اتا-انالارى بالالارىنىڭ وتباسىنداعى جانجالدان كەيىن ۇيدەن شىعىپ، قايتا ورالماعانى تۋرالى پوليتسياعا مالىمدەگەن، دەپ حابارلايدى قازاقپارات Otyrar.kz-كە سىلتەمە جاساپ.
ءتارتىپ ساقشىلارى جوعارى سىنىپتا وقيتىن ەكى ۇل مەن ءتورت قىزدى تاۋىپ، از ۋاقىت ىشىندە امان-ەسەن ۇيلەرىنە جەتكىزدى. مەكتەپ وقۋشىلارىنىڭ ءبىرى جاي كوشەدە جۇرسە، ەندى ءبىرى جولداستارىنىڭ ۇيىندە قوناقتا بولعان.
جەتكىنشەكتەردىڭ مۇنداي مىنەز-قۇلىق كورسەتۋىنە ۇلكەندەردىڭ باقىلاۋىنان قۇتىلىپ، قالاعان نارسەسىن ىستەۋگە ۇمتىلۋى سەبەپ بولعانى انىقتالدى.
ماسەلەن، جىگىتتەردىڭ ءبىرى عاشىق بولعانىن، ءبىراق اناسى وعان قىزبەن كەزدەسۋگە تىيىم سالعانىن جەتكىزدى. تاعى ءبىر بويجەتكەن بۇل ارەكەتىن اتا-اناسىنان بولەك تۇرعىسى كەلەتىنىمەن تۇسىندىرسە، ەندى ءبىرى دوستارىنا كەشكە دەيىن سىرتتا جۇرۋگە رۇقسات ەتىلگەنىمەن، وعان رۇقسات جوق دەپ شاعىمداندى.
پوليتسيا قىزمەتكەرلەرى جاسوسپىرىمدەرمەن جانە ولاردىڭ زاڭدى وكىلدەرىمەن پروفيلاكتيكالىق اڭگىمە جۇرگىزدى. ءوز كەزەگىندە اتا- انالار پوليتسيا قىزمەتكەرلەرىنە جەدەل جۇمىس اتقارىپ، وزگەنىڭ باسىنا تۇسكەن ىسكە نەمقۇرايلى قاراماعانى ءۇشىن العىس ءبىلدىردى.
"بالانىڭ ۇيدەن ءوز بەتىنشە كەتۋىنىڭ سوڭى قايعىلى وقيعالارعا اكەلۋى مۇمكىن. بۇعان جول بەرمەۋ ءۇشىن اتا-انالارعا قىراعى بولۋ ۇسىنىلادى. سونداي-اق، كامەلەتكە تولماعان بالاڭىزدىڭ اينالاسىنا نازار اۋدارىپ، ونىڭ دوستارىنىڭ مەكەن-جايى مەن بايلانىس نومىرلەرىن ءبىلىپ ءجۇرىڭىز، بالانىڭ بوس ۋاقىتىن الدىن الا جوسپارلاپ، ۇيىمداستىرىپ، كۇن سايىن ونىڭ جەتىستىكتەرى مەن قيىندىقتارى تۋرالى سويلەسىڭىزدەر"، - دەپ ەسكەرتتى شىمكەنت قالاسى پوليتسيا دەپارتامەنتى.
