شىمكەنتتە دارىگەرلەردى ۇرماق بولعان ەر ادام بەلگىسىز سۇيىقتىق ىشكەن
شىمكەنتتە دارىگەرلەردى ۇرماق بولعان ەر ادام بەلگىسىز سۇيىقتىق ىشكەن. بۇل تۋرالى شىمكەنت قالاسى دەنساۋلىق ساقتاۋ باسقارماسىنىڭ باسپا ءسوز قىزمەتى مالىمدەدى، دەپ حابارلايدى قازاقپارات ءتىلشىسى.
28 جاستاعى ەر ادام بەلگىسىز سۇيىقتىقتى ءىشىپ قويعاننان كەيىن تۋىستارى جەدەل جاردەم شاقىرعان. سودان دارىگەرلەر ونى گيپەرباريالىق وكسيگەناتسيا ورتالىعىنا الىپ بارعان.
«دارىگەرلەر ناۋقاستى تەكسەرىپ شىققان سوڭ، پسيحيكالىق قوزۋ جاعدايىنىڭ بولۋىنا بايلانىستى ەم شارالارىن جۇرگىزۋ ماقساتىندا جانساقتاۋ بولىمشەسىنە كىرگىزگەن. الايدا ول مەديتسينا قىزمەتكەرلەرىنە كۇش كورسەتىپ، قارسىلىق تانىتقان. ورىن العان جاعدايعا بايلانىستى 102 قىزمەتىنە حابار بەرىلدى» دەلىنگەن شىمكەنت قالاسى دەنساۋلىق ساقتاۋ باسقارماسىنىڭ باسپا ءسوز قىزمەتى ۇسىنعان اقپاراتتا.
ايتا كەتەيىك، بۇعان دەيىن شىمكەنتتە دارىگەرلەردى ۇرماق بولعان ەر ادام قاماۋعا الىنعانىن جازعان بولاتىنبىز.
