شىمكەنتتە بومبا تۋرالى جالعان اقپارات بەرگەن ەر ادام 1 جىل تۇرمەدە وتىراتىن بولدى
شىمكەنتتە بومبا تۋرالى جالعان اقپارات تاراتقان ەر ادام 1 جىل تۇرمەدە وتىراتىن بولدى، دەپ حابارلايدى Kazinform.
جالعان اقپارات تاراتقان كۇدىكتى 49 جاستاعى تۇركىستان وبلىسىنىڭ تۇرعىنى بولىپ شىقتى. سوتتالۋشى ق ر ق ك- ءنىڭ 273-بابىندا كوزدەلگەن قىلمىستىق قۇقىق بۇزۋشىلىقتى جاساعانى ءۇشىن كىنالى دەپ تانىلىپ، سوتتىڭ شەشىمىمەن 1 جىلعا باس بوستاندىعىنان ايرىلدى.
ءتارتىپ ساقشىلارى تەرروريزم اكتىسى تۋرالى كورىنەۋ جالعان اقپارات تاراتۋ قاۋىپتى قىلمىس بولىپ تابىلاتىنىن جانە 5 مىڭ ايلىق ەسەپتىك كورسەتكىشكە دەيىنگى مولشەردە ايىپپۇل سالۋعا نەمەسە سول مولشەردە تۇزەۋ جۇمىستارىنا تارتۋعا، نە 5 جىلعا باس بوستاندىعىنان ايىرۋعا نەمەسە شەكتەۋگە اكەپ سوعاتىنىن ەسكەرتەدى.
«پوليتسيانىڭ «102» ارناسىنا قالاداعى ءدامحانالاردىڭ بىرىنە جارىلعىش زات قويىلعانى تۋرالى قوڭىراۋ كەلىپ ءتۇستى. حابارلامانى العان پوليتسەيلەر دەرەۋ وقيعا ورنىنا باردى. قۇقىق قورعاۋ ورگاندارى مۇددەلى قىزمەتتەرمەن بىرگە عيماراتتان بارلىق كەلۋشىلەر مەن قىزمەتكەرلەردى ەۆاكۋاتسيالادى. تەكسەرۋ ناتيجەسىندە قوعامدىق تاماقتانۋ مەكەمەسىنەن جارىلعىش زات تابىلعان جوق» - دەلىنگەن شىمكەنت قالاسى پوليتسيا دەپارتامەنتىنىڭ باسپا ءسوز قىزمەتى تاراتقان اقپاراتتا.
