شىمكەنتتە باۋىرى جىرتىلىپ كەتكەن تۇرىكمەنستان ازاماتىنا بىرنەشە وتا جاسالدى
شىمكەنت. قازاقپارات - 27 جاستاعى ازاماتتىڭ قازىرگى جاعدايى جاقسى. شىمكەنت قالالىق №1 كلينيكالىق اۋرۋحاناعا جەدەل جاردەم كولىگىمەن اۋىر حالدە تۇرىكمەنستان ازاماتى جەتكىزىلگەن.
جاراقاتى مەن دەنساۋلىق جاعدايىنا قاراي دارىگەرلەر 27 جاستاعى ازاماتقا بىرنەشە وپەراتسيا جاسادى.
الدىمەن ناۋقاستىڭ باۋىرى جىرتىلۋىنان ىشىنەن قان كەتۋىن توقتاتاتىن وتا جاسادى. باۋىر قىزمەتى جاقسارعان پاتسيەنتكە ەكىنشى كەزەڭدە ورتوپەديالىق وتا جاسالىپ، اياق سۇيەگىنىڭ سىنعانىنا بايلانىستى فيكساتسيا قويىلدى.
سونداي-اق، تەكسەرۋ بارىسىندا ناۋقاستا ترومب انىقتالعان. ترومبتىڭ قاۋىپتىلىگى وپەراتسياعا قارسى كورسەتكىش بولعاندىقتان، ترومبتى توقتاتۋ ءۇشىن ناۋقاستىڭ تامىرىنىڭ ىشىنە كاۆا فيلتر قويىلدى. كاۆا فيلتر - ول ارنايى تەمىر، تور تارىزدەس، اياقتاعى ترومبتىڭ جۇرەككە كەتپەۋىن جانە وپەراتسيادان امان-ەسەن شىعۋىنا كومەك بەرەتىن مەديتسينالىق قۇرال.
شىمكەنت قالاسىنداعى اۋرۋحانادا كومەك كورسەتىلگەن ازاماتتىڭ قازىرگى جاعدايى جاقسى. دارىگەرلەر وپەراتسيالاردىڭ ءساتتى وتكەنىن العا تارتتى.
ايتا كەتەيىك، بۇدان بۇرىن تۇركىستان وبلىسىندا العاش رەت باۋىر ترانسپلانتاتسياسى جاسالعانىن جازعان بولاتىنبىز.
اۆتور
قايرات زاينيشيەۆ
