شىمكەنتتە اۋدان اكىمىنە ايىپپۇل سالىندى
شىمكەنت. KAZINFORM - شىمكەنت قالاسى قاراتاۋ اۋدانىنىڭ اكىمىنە ايىپپۇل سالىندى.
قاراتاۋ اۋدانىنىڭ پروكۋراتۋراسى مەملەكەتتىك ساتىپ الۋدى جۇزەگە اسىرۋ جانە بيۋجەت قاراجاتىن يگەرۋ كەزىندە زاڭدىلىقتىڭ ساقتالۋىنا تالداۋ جۇرگىزگەن.
ونىڭ ناتيجەسى بويىنشا كونكۋرستىق قۇجاتتامادا مەمەلەكەتتىك ساتىپ الۋ بويىنشا زاڭنامادا كوزدەلمەگەن تالاپتاردى كورسەتۋ دەرەكتەرى بەلگىلى بولعان. سونداي-اق الەۋەتتى ءونىم بەرۋشىنى بىلىكتىلىك تالاپتارىنا سايكەس ەمەس دەپ زاڭسىز تانۋ جانە ءوز مىندەتتەمەلەرىن تيىسىنشە ورىنداماعان جەتكىزۋشىلەرگە شارا قولدانباۋ فاكتىلەرى انىقتالعان.
قالالىق پروكۋراتۋرا مالىمەتىنشە، اۋدان اكىمىنە قاتىستى پروكۋرورلىق قاداعالاۋ اكتىسى بويىنشا اكىمشىلىك قۇقىق بۇزۋشىلىق تۋرالى كودەكستىڭ 207-بابى 5,7 جانە 10-بولىكتەرى بويىنشا (قازاقستان رەسپۋبليكاسىنىڭ مەملەكەتتىك ساتىپ الۋ تۋرالى زاڭناماسىن بۇزۋ) اكىمشىلىك قۇقىق بۇزۋشىلىق تۋرالى 9 حاتتاما تولتىرىلدى. مەملەكەت كىرىسىنە 332280 تەڭگە كولەمىندە ايىپپۇل ءوندىرىلدى.
