شىمكەنتتە 6 جاستاعى جەتكىنشەكتى ازاپتاپ ولتىرگەن تۋىسى 20 جىلعا سوتتالدى
شىمكەنت. KAZINFORM - سوتتالۋشى اپكەسىنىڭ قىزىن ۇرىپ، ەسىنەن تاندىرىپ، كەيىننەن ۆانناداعى سۋعا تۇنشىقتىرعان.
شىمكەنت قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا ق ك- ءنىڭ 99-بابىنىڭ 3-بولىگىمەن ايىپتالۋشىعا قاتىستى قىلمىستىق ءىس قارالدى.
وقيعا وتكەن جىلدىڭ ماۋسىم ايىندا شىمكەنت قالاسىندا بولدى. اقپان باتىر كوشەسى بويىندا ورنالاسقان جالدامالى پاتەردە سوتتالۋشى اپكەسىنىڭ 2018-جىلى تۋعان قىزىن ازاپتاپ ولتىرگەن.
ۇيقىسىنان ويانعان 6 جاستاعى جەتكىنشەكتىڭ ايقايلاي باستاعانىنا اشۋلانعان سوتتالۋشى قىزدىڭ اياق-قولىن بىرىكتىرىپ بايلاپ، ۇرىپ-سوعىپ، ەدەنگە قۇلاتقان. ەسىنەن تانىپ قالعان ونى ۆانناعا سۋ تولتىرىپ، تۇنشىقتىرىپ قاساقانا ولتىرگەن.
سوت شەشىمىمەن سوتتالۋشى ق ك- ءتىڭ 99-بابىنىڭ 3-بولىگىمەن كىنالى دەپ تانىلدى. سونداي-اق، سوت 20 جىلعا باس بوستاندىعىنان ايىرۋ جازاسىن تاعايىندادى.
- جازانى قىلمىستىق اتقارۋ جۇيەسىنىڭ قاۋىپسىزدىگى ورتاشا مەكەمەلەرىندە وتەۋ بەلگىلەندى. ۇكىم زاڭدى كۇشىنە ەندى، - دەلىنگەن شىمكەنت قالالىق سوتىنىڭ باسپا ءسوز قىزمەتى ۇسىنعان اقپاراتتا.
ايتا كەتەيىك، بۇدان بۇرىن الماتىدا قاڭتار وقيعاسىنا قاتىستى بىرنەشە ايىپتالۋشىعا سوت ۇكىمى شىققانىن جازعان بولاتىنبىز.
