شىمكەنتتە 4 مىڭنان استام ادامدى الداپ سوققان قارجى پيراميداسى انىقتالدى
استانا. KAZINFORM - قارجىلىق مونيتورينگ اگەنتتىگى شىمكەنت قالاسى بويىنشا دەپارتامەنتى «Nazira Gold» قارجى پيراميداسىنىڭ قىزمەتىن توقتاتتى.
وزدەرىن زەرگەرلىك بۇيىمدار ساتۋمەن اينالىساتىن كومپانيا رەتىندە تانىستىرعان كۇدىكتىلەر سالىمشىلارعا سالعان سومالارىنان %20-40 كولەمىندە اي سايىنعى تابىس تابۋعا ۋادە بەرگەن. ال، شىن مانىندە تولەمدەر ساتۋدان تۇسكەن پايدادان ەمەس، جاڭا قاتىسۋشىلاردىڭ سالىمدارىنان جۇزەگە اسىرىلعان.
- ناتيجەسىندە قارجى پيراميداسىنا 4 مىڭنان استام سالىمشى تارتىلعان. قىلمىستىق تابىسقا كۇدىكتىلەر ەكى پاتەر، تۇرعىن ءۇي جانە 10 اۆتوكولىك ساتىپ العان. ءتىنتۋ بارىسىندا 374 ميلليون تەڭگە قولما-قول اقشا جانە قۇنى 300 ميلليون تەڭگەدەن استام 12 ك گ التىن بۇيىمدار تاركىلەنگەن، - دەپ جازدى دەپارتامەنتتەن.
كۇدىكتىلەر ەكى ايعا قاماۋعا الىندى.
سوتقا دەيىنگى تەرگەۋ جالعاسۋدا.
قىلمىستىق ءىس جۇرگىزۋ كودەكسىنىڭ 201-بابىنا سايكەس، باسقا اقپارات جاريالاۋعا جاتپايدى.
ايتا كەتەيىك، اگەنتتىكتە قارجى پيراميدالارىنىڭ بەلگىلەرىن تەكسەرۋگە مۇمكىندىك بەرەتىن «Baiqa, piramida!» Telegram بوتى جۇمىس ىستەپ تۇر.
- ەگەر ءسىز نەمەسە جاقىندارىڭىز قارجى پيراميداسىنىڭ ارەكەتىنە تاپ بولسا، تۇرعىلىقتى جەرىڭىز بويىنشا ەكونوميكالىق تەرگەپ-تەكسەرۋ دەپارتامەنتىنە جۇگىنۋدى سۇرايمىز. ازاماتتاردى ساق بولۋعا جانە كۇماندى قارجىلىق ۇيىمدارعا جيناقتارىن سالماۋعا شاقىرامىز، - دەلىنگەن اقپاراتتا.
