شىمكەنت تۇرعىنى قارجى پيراميداسىنا 200-دەن استام ادامنان 700 ميلليون تەڭگە تارتقان
ق ر قارجىلىق مونيتورينگ اگەنتتىگىنىڭ شىمكەنت قالاسى بويىنشا دەپارتامەنتى «Chia Tai Tianging» قارجى پيراميداسىنىڭ قۇرىلىمدىق بولىمشە باسشىسىنا قاتىستى تەرگەۋدى اياقتادى، دەپ حابارلايدى Kazinform اگەنتتىكتىڭ باسپا ءسوز قىزمەتىنە سىلتەمە جاساپ.
شىمكەنت قالاسىنىڭ تۇرعىنى 2022 - جىلدىڭ قاراشاسى مەن 2023 - جىلدىڭ ءساۋىرى ارالىعىندا اتالعان قارجى پيراميداسىنىڭ قالاداعى فيليالىن باسقارعانى انىقتالدى.
ول 700 ميلليون تەڭگەگە ماتەريالدىق زالال كەلتىرە وتىرىپ، ەكى جۇزدەن استام سالىمشى تارتقان.
قازىرگى ۋاقىتتا كۇدىكتىگە قاتىستى سوتقا دەيىنگى تەرگەۋ اياقتالدى جانە ءىس سوتقا جىبەرىلدى.
قارجى پيراميدالارىن قۇرۋ قىلمىستىق جاۋاپكەرشىلىككە اكەپ سوعاتىنىن جانە مۇلكى تاركىلەنىپ، 10 جىلعا دەيىنگى مەرزىمگە باس بوستاندىعىنان ايىرۋ تۇرىندەگى جازانى كوزدەيتىنىن ەسكەرتەمىز.
ازاماتتاردى قىراعى بولۋعا جانە ءوز جيناقتارىن كۇماندى قارجى ۇيىمدارىنا سالماۋعا شاقىرامىز.
«كومپانيالاردى قارجىلىق پيراميدا بەلگىلەرىنىڭ بار- جوعىنا «Baiqa, piramida!» (https://t.me/BAIQApiramidaBOT) تەلەگرامم بوتى ارقىلى تەكسەرە الاسىز»، - دەلىنگەن حابارلامادا.
اۆتور
ايدار وسپاناليەۆ
