شىڭجاڭدىق قازاق مالشى 46 ميلليون تەڭگە سىياقى الدى - شەتەلدەگى قازاق باسپا ءسوزى
«KAZINFORM» ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.
موڭعولياداعى قانداسىمىز ءشامسيا دوكتور اتاندى - Janadauir
ۇلانباتىر قالاسىندا تابىستى جۇمىستاپ جۇرگەن ءبىر ارىپتەسىم تۋرالى ايتا كەتكەندى ءجون كورىپ وتىرمىن. ول - كوز اۋرۋلارىنىڭ دوكتورى، ۇلانباتىر قالاسىنداعى بالا جانە انانىڭ دەنساۋلىعىن ساقتاۋ ورتالىعىنىڭ بالالاردىڭ كوز دارىگەرى ءشامسيا مۇرات قىزى، دەپ جازدى موڭعوليالىق «Janadauir» باسىلىمى.
اتالعان اقپارار كوزىنىڭ دەرگىنە سۇيەنسەك، ءشامسيا 1999 -جىلى مەديتسينا ۋنيۆەرسيتەتىن ءبىتىرىپ، 1991-2001 -جىلدار ارالىعىندا انا مەن بالا عىلىمي زەرتتەۋ ورتالىعىندا كوز دارىگەرى ماماندىعى بويىنشا رەزيدەنتۋرا ءبىتىرىپ، العاشقى ەڭبەك جولىن باستايدى.
ول 2005-2007 -جىلدارى رەسەي فەدەراتسياسىنىڭ سانكت- پەتەربۋرگ قالاسىندا ماماندىعىن جەتىلدىرگەن. جۇمىس بابىمەن وڭتۇستىك كورەيا، امەريكا قۇراما شتاتتارى، ينديا، اۆستراليا، ماكاو قاتارلى ەلدەرگە بارىپ، تاجىريبە الماسىپ، ماماندىعىن جەتىلدىرۋدەن تىس، مەديتسينا سالاسىندا ءبىلىم بەرۋ ىسىنە دە ات سالىسقان. ش. مۇرات قىزى وسى 25 جىلدىق ءىس- قىزمەتىندە بالالاردىڭ كوز جانارىنىڭ كورۋ قابىلەتىن جاقسارتۋ، تۋادان جانە جۇرە پايدا بولعان كوز جانارىنىڭ تومەندەۋ پروتسەسىن توقتاتۋ، ەرتە انىقتاۋ، كوز وتاسىن جاساۋ قاتارلى يگى ىستەرىمەن تانىلىپ، كوپتەگەن حالىقارالىق دارەجەدەگى سىي- ماراپاتتارعا يە بولعان.
سونداي- اق ول ءومىر بويى ىزدەنىستە بولعان دارىگەرلەردىڭ ءبىرى. ءشامسيا مۇرات قىزى 2010 -جىلى وڭتۇستىك كورەيانىڭ INHA ۋنيۆەرسيتەتىندە 3 ايلىق وقىتۋىنا، 2012 -جىلى اۆستراليانىڭ Salzburg Weill Cornell Seminar in Ophthalmology, 2014 -جىلى جاپونيانىڭ توكيو قالاسىنداعى حالىقارالىق كوز دارىگەرلەرىنىڭ فورۋمىنا، 2015 -جىلى امەريكا قۇراما شتاتتارىنىڭ مۇمكىندىگى شەكتەۋلى ازاماتتاردىڭ ارنايى وقىتۋىنا، 2016 -جىلى بىرىككەن اراب امىرلىگىنىڭ Hyderabad قالاسىندا كوزى كورمەيتىن ادامدارعا كوز قاراشىعىن الماستىرۋ وقىتۋىنا قاتىسىپ قايتقان.
سونىمەن قاتار 2016-2017 ارالىعىندا ءبىر جىل استام ۋاقىت بىرىككەن اراب امىرلىگىنىڭ Hyderabad ، Bhubaneswar قالالارىندا بالالاردىڭ كوز اۋرۋلارىنا قاتىستى وقىتۋعا، 2018 -جىلى «وربيس» حالىقارالىق ۇيىنىڭ «Strabismus hands-on traineە» وقىتۋىنا، 2022 -جىلى مالايزيانىڭ كۋالا قالاسىندا، 2024 -جىلى ماكاو قالاسىندا وتكەن حالىقارالىق وقىتۋلارعا تابىستى قاتىسىپ، ەلىمىزدىڭ مەديتسينا سالاسىندا ايتارلىقتاي ۇلەس قوسىپ، بالالاردىڭ كوزىن ەمدەۋ، ساۋىقتىرۋ، كورۋ قابىلەتىن جاقسارتۋ ماقساتىندا جۇرگەن مامانداردىڭ ءبىرى. ءشامسيانىڭ وسى ەڭبەگىن ازيا، تىنىق مۇحيتى كوز دارىگەرلەرىنىڭ قاۋىمداستىعى جوعارى باعالاپ «Outstanding service Prevention of Blindness Award» سىيلىعىن 2022 -جىلى تابىستاسا، ەلىمىز پرەزيندەنتىنىڭ جارلىعىمەن جاڭا جىل قارساڭىندا «التىن جۇلدىز» وردەنىمەن ماراپاتتالعان.
شىڭجاڭدىق قازاق باقتاشى 46 ميلليون تەڭگە كولەمىندە سىيلىق الدى - Harajorga
جاقىندا قىتايدىڭ 8-مەملەكەتتىك تۇيە باقتاشىلار جينالىسى شىڭجاڭ ولكەسىندەگى بۋرىلتوعاي اۋدانىندا ءوتتى. اتالعان باسقوسۋعا 800 دەن استام تۇيە شارۋشىلىعىمەن اينالىساتىن ۋاكىلدەر بۇكىل ەلدىڭ جەر- جەرىنەن كەلدى. جينالىستا «ساپا سىيلىعى»، «سەنىمدىلىك سىيلىعى»، «ۇزدىك ءسۇت پۋنكتى، ۇزدىك ءسۇت تاسۋشى» قاتارلى سىيلىق اقشالارى تاراتىلىپ، ۇزدىك تۇيەشىلەردىڭ ەڭبەگى ماراپاتتالدى، دەپ حابارلايدى قىتايلىق «Harajorga» الەۋمەتتىك جەلىسى.
اتالعان ايتۋلى ءىس- شارادا بۋرىلتوعاي اۋدانى قاراماعاي قالاشىعى ويقورا اۋىلىنىڭ تۇرعىنى ومىربەك مىسىرحان ۇلى اتتى قانداسىمىزعا 650 مىڭ يۋان(46 ميلليون تەڭگە كولەمىندە - اۆت. ) سىيلىق تابىستالدى.
قىتايلىق ب ا ق- تىڭ دەرەگىنشە، بۇل «سەنىمدىلىك سىيلىعىنىڭ» ەڭ جوعارى دەڭگەيدەگى سىيلىق اقشاسى بولىپ سانالادى ەكەن.
بۇحاراعا 2024 -جىلى 6 ميلليونعا جۋىق تۋريست كەلگەن - «ءو ز ا»
عاسىرلار بويعى سىر مەن قۇپيانى بويىنا سىڭىرگەن، ۇلى تاريحي ەسكەرتكىشتەرى مەن زيارات ورىندارىن ساقتاپ كەلەجاتقان كونە بۇحارا بۇگىندە بۇرىنعىدان دا كوپ تۋريستەردى قابىلداۋدا، دەپ حابارلايدى وزبەكستاندىق «ءو زا» اقپارات اگەنتتىگى.
اتالعان ب ا ق- تىڭ مالىمەتىنشە، 2024 -جىلى ەجەلگى شاھارعا 1 ميلليون 745 مىڭ 200-دەن استام شەتەلدىك تۋريست كەلىپ، ولارعا كورسەتىلگەن قىزمەتتەر ارقىلى تۋريزم ەكسپورتى 436,3 ميلليون ا ق ش دوللارىنا جەتتى. سونىمەن قاتار، رەسپۋبليكانىڭ ءارتۇرلى وڭىرلەرىنەن 4 ميلليوننان استام جەرگىلىكتى تۇرعىن بۇحاراعا ساياحات ماقساتىندا ساپار شەككەن.
قالانىڭ تۋريستىك الەۋەتىن جاقسارتۋ ماقساتىندا وتكەن جىلى 74 جاڭا ورنالاستىرۋ ورنى اشىلدى، ونىڭ ىشىندە 17 قوناقۇي، 15 حوستەل جانە 42 وتباسىلىق قوناق ءۇي قىزمەتىن باستادى. سونداي- اق، 43 جاڭا تۋروپەراتور مەن تۋراگەنت جۇمىسىن باستاپ، ولاردىڭ جالپى سانى 2023 -جىلعى 143 تەن 186 عا جەتتى.
يراندىق ءانشىنىڭ قاسيەتتى رامازان ايىندا 5 تىلدەگى كونسەرتى وتەدى - ParsToday
يراندىق ءانشى رامازان ايىنا وراي الەمدە كەڭىنەن تارالعان بەس تىلدە ءۇشىنشى كونسەرتىن وتكىزەدى، دەپ حابارلايدى «ParsToday» اقپارات اگەنتتىگى.
اتالعان ب ا ق- تىڭ مالىمەتىنشە، يراندىق ءانشى يحسان ياسين رامازان ايىنا وراي ءۇشىنشى كونتسەرتىن پارسى، اعىلشىن، اراب، كۇرد جانە ءازىربايجان تىلدەرىندە وتكىزەدى.
ParsToday اگەنتتىگىنىڭ يرنا- عا سىلتەمە جاساعان حابارلاماسىنا سايكەس، ياسين بۇل كونسەرتتە «سانا» وركەسترى مەن حور توبىمەن بىرگە «مەنىڭ ايىم» البومىنان شىعارمالاردى جانە ءوزىنىڭ كەيبىر جاڭا تۋىندىلارىن ورىندايدى.
ايتا كەتەيىك، يحسان ياسين 1999 -جىلى دۇنيەگە كەلگەن جانە سۋفيلىق پەن يسلامدىق مۋزىكا شىعارمالارىن جازۋ سالاسىندا بەلسەندىلىك كورسەتىپ كەلەدى. ول بۇل مۋزىكا ءستيلى تىلدەرگە، ەلدەرگە جانە شەكارالارعا بايلانىستى جانە وسى ستيلدە ءار ءتۇرلى تىلدە شىعارمالار جاسالۋى كەرەك دەپ ەسەپتەيدى.
«بۇل ءانشىنىڭ شىعارمالارى نەگىزىنەن پارسى، اعىلشىن جانە اراب تىلدەرىندە شىعارىلعان. دەگەنمەن، ياسين تەك وسى تىلدەرمەن شەكتەلمەيدى جانە ونىڭ شىعارمالارىندا مىسىر، كانادا، ا ق ش، وڭتۇستىك كورەيا، البانيا، يندونەزيا سياقتى ءارتۇرلى ەلدەردەن شىققان ونەرپازدارمەن ىنتىماقتاستىق كورىنىس تابادى» ، دەپ جازادى يراندىق ب ا ق.
قازاقستانداعى ەكى ۋنيۆەرسيتەت پەن قىتايدىڭ سيانگان ءبىلىم بەرۋ ۋنيۆەرسيتەتىنىڭ بىرلەسكەن جوباسى ىسكە قوسىلدى - «حالىق گازەتى»
قازاقستانداعى ەكى پەداگوگيكالىق ۋنيۆەرسيتەت پەن قىتايدىڭ سيانگان ءبىلىم بەرۋ ۋنيۆەرسيتەتىنىڭ بىرلەسكەن جوباسى ىسكە قوسىلدى، دەپ حابارلايدى قىتايلىق «حالىق گازەتى» باسىلىمى «24kz» كە سىلتەمە جاساپ.
كەلتىرىلگەن دەرەكتەرگە سۇيەنسەك، ءۇشجاقتى كەلىسىم اياسىندا قازاقستان ءبىلىم اكادەمياسى قۇرىلىپ، STEM باعىتىن دامىتۋعا ارنالعان ەكى ورتالىق اشىلدى. ونىڭ ءبىرى اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە، ەكىنشىسى قازاق ۇلتتىق قىزدار پەداگوگيكالىق ۋنيۆەرسيتەتى جانىنان جۇمىسىن باستادى.
قازاقستان ءبىلىم اكادەمياسى ءبىلىم بەرۋ سالاسىنداعى يننوۆاتسيالىق زەرتتەۋلەر مەن يدەيالاردى ىسكە اسىرماق. اسىرەسە، بولاشاق پەداگوگتاردىڭ بىلىكتىگىن ارتتىرۋعا سەپتىگىن تيزبەك.
«تاجىريبە الماسۋ مەن تىڭ يننوۆاتسيالاردى ەنگىزۋ جاستاردى زامان تالابىنا ساي مامان ەتىپ دايارلاۋعا ۇلەس قوسادى. مۇعالىمدەر وسى كۇزدەن باستاپ بىلىكتىلىگىن جەتىلدىرە الادى»، دەپ جازادى قىتايلىق باسىلىم.
بەيسەن سۇلتان
