شىعىس قازاقستاندا قىستا دا ليمون ءوسىپ تۇر

تەك ليمونى ەمەس، بۇل جىلىجايدىڭ ءوزى دە اتاقتى. سەبەبى ونى ارنايى كورۋگە ەۋروپادان تۋريستەر كەلەدى.

ليموننىڭ سالماعى - 1 جارىم كەلىگە جەتەدى

ايازى بەت قارىپ، جەلى ازىناپ تۇرعان اقپاندا جاسىل جەلەككە مالىنعان جەراستى باققا كىرە سالىسىمەن ونە- بويىمىز عانا ەمەس، جان سارايىمىز دا جىلىنىپ قالعانداي. وسكەمەننەن 20 شاقىرىمنان استام جەردە ورنالاسقان بۇل «جەر- سۋ» جىلىجاي كەشەنى 2008 -جىلى اشىلعان. ونىڭ يەلەرى - جاستارى الپىستىڭ اۋىلىن ارالاپ كەتكەن نيكولاي مەن ليۋدميلا.

الايدا ءبىز بارعاندا ەكەۋى دە جوق ەكەن. دەسە دە بۇل جەردە 8 جىل ەكسكۋرسيا جۇرگىزىپ كەلە جاتقان ەلەنا رىجنيكوۆا ءىشىن ارالاتقىزىپ، ءار ساۋالىمىزعا ىجداھاتپەن جاۋاپ بەردى.

- ليۋدميلا زەمليانايا زەينەتكە شىعار الدىندا 20 جىل بويى ۋچيليشەدە ەلەكتريكتەرگە ساباق بەردى. ءارقاشان وسىمدىكتەردى جاقسى كورەتىن. بەينەتىنىڭ زەينەتىن كورەتىن جاسقا جەتكەندە وسىنداي جىلىجاي اشۋ تۋرالى ويىن كۇيەۋى نيكولايعا جەتكىزگەن. ول بىردەن قولداپ، كيەۆكە ۇشاق بيلەتىن الادى. ءسويتىپ، كييەۆتىك ءىرى سورتتى ليموننىڭ جانە باناننىڭ بىرنەشە كوشەتىن الىپ كەلگەن، - دەپ باستادى ول اڭگىمەسىن.

كوپتەگەن وسىمدىكتىڭ تىنىسى ۇزىلمەي وسۋىنە قاجەتتى جاعدايلار جاسالۋى ءتيىس. جەر ۇستىندە تەمپەراتۋرا، جارىق جانە ىلعال دەڭگەيىن ءبىر قالىپتى ۇستاپ تۇرۋ مۇمكىن ەمەس. سوندىقتان ەرلى- زايىپتىلار جىلىجايدى جەر استىنان اشتى.

- جالپى اۋماعى 1000 شارشى مەتردى قۇرايتىن كەشەن 4 كە بولىنگەن. بىرىنشىسىندە تسيترۋس جەمىستەرى، ونىڭ ىشىندە سالماعى 1 جارىم كەلىگە دەيىن جەتەتىن اتاقتى «كيەۆ» ليمونى مەن بانان وسىرىلەدى. ليمون اعاشتارى تەمپەراتۋرانىڭ تومەندەۋىنە وتە سەزىمتال جانە ەكى گرادۋس سۋىقتىڭ وزىندە قاتىپ قالادى. ال جىلىجايداعى تەمپەراتۋرا +16°c. ءار وسىمدىكتى قولمەن سۋارامىز، - دەيدى ەلەنا رىجنيكوۆا.

400 دەن استام وسىمدىك جايقالىپ تۇر

ليمون اعاشى گۇلدەگەن كەزدە، جىلىجاي ءىشى حوش يىسكە بولەنەدى. ال توعىز ايدان كەيىن پىسكەن ليموندى ءۇزىپ، جيناپ الادى.

جىلىجايدىڭ باسقا بولمەلەرىندە تروپيكالىق، سۋبتروپيكالىق، ءشولدى جانە جەرورتا تەڭىزى وسىمدىكتەرى بار. ونىڭ ءاربىرى ەرەكشە كۇتىمدى قاجەت ەتەدى. اتاپ ايتقاندا، مۇندا مۋشمۋلا، جاپوننىڭ التىن اعاشى، فيكۋس، ورحيدەيا، كاكتۋس، الوە، گەران، جاسمين جايقالىپ تۇر. بارلىعى جەر شارىنىڭ تۇكپىر- تۇكپىرىنەن كەلگەن 400 دەن استام وسىمدىك ءتۇرى وسەدى.

جىلىجاي اۋدانداعى ءتۋريزمنىڭ دامىنا دا ىقپال ەتۋدە. كۇن سايىن ساعات 9.00 دەن 15.00 گە دەيىن كەلۋشىلەردى قابىلدايدى. باعاسى - 1500 تەڭگە. وبلىستىڭ تۇكپىر- تۇكپىرىنەن عانا ەمەس، قازاقستاننىڭ ءار وڭىرىنەن، ءتىپتى شەتەلدەن دە ارنايى ءاتىزىن سالاتىندار بار. ماسەلەن، «كيەۆ» ليموندارىن كورۋگە فرانسيا مەن گەرمانيادان تۋريستەر ارنايىلاپ كەلىپتى.

- كەلەسى ايدا ليمون مەن بانان پىسەدى. شيە تۇستەس كاليستەمون بۇتاسى دا گۇلدەيدى. كوز جاۋىن الاتىن بۇل وسىمدىكتى بالالار ەرەكشە ۇناتىپ جاتادى، - دەيدى ەكسكۋرسيا جۇرگىزەتىن مامان.

تالعاتجان مۇحامەتبەك ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى