شىعىس قازاقستاندا مەملەكەتتىك قىزمەتتىڭ بەدەلىن تۇسىرگەن اكىم جاۋاپقا تارتىلدى
وسكەمەن. KAZINFORM - شىعىس قازاقستان وبلىسى سامار اۋدانىنداعى مەملەكەتتىك قىزمەتتىڭ بەدەلىن تۇسىرگەن اۋىلدىق وكرۋگ اكىمى جاۋاپقا تارتىلدى.
سامار اۋىلدىق وكرۋگىنىڭ اكىمى مەملەكەتتىك ساتىپ الۋ تۋرالى زاڭنامانى بۇزعان. ول باسقا الەۋەتتى جەتكىزۋشىلەردى تەندەرگە قاتىسۋ مۇمكىندىگىنەن ايىرىپ، ءبىر كوزدەن ءبىر ج ش س- مەن نەگىزسىز ەكى شارت جاساستى.
- كەلىسىمشارتتاردىڭ جالپى سوماسى 20 ميلليون تەڭگەدەن استى. بۇل قاراجاتقا قاتتى تۇرمىستىق قالدىقتار پوليگونىن قورشاۋ جانە اۋدان ورتالىعىنا بەينەباقىلاۋ جۇيەسىن ورناتۋ جۇمىستارى ساتىپ الىنعان. الايدا سوڭعى شارت بويىنشا ناقتى ورىندالماعان جۇمىستار ءۇشىن ءىشىنارا تولەم جاسالعان. مەملەكەتتىك ساتىپ الۋدى ۇيىمداستىرۋ جانە وتكىزۋ ءتارتىبىن بۇزعانى ءۇشىن اۋدان پروكۋراتۋراسىنىڭ قاۋلىسىنا سايكەس، سامار اۋىلدىق وكرۋگىنىڭ اكىمى اكىمشىلىك جاۋاپكەرشىلىككە تارتىلدى. وعان 200 ا ە ك مولشەرىندە ايىپپۇل سالىندى، - دەپ حابارلادى پروكۋراتۋرادان.
سونىمەن قاتار اۋدان پروكۋراتۋراسى مەملەكەتتىك قىزمەت ىستەرى جونىندەگى ۋاكىلەتتى ورگاننىڭ ادەپ كەڭەسىنىڭ قاراۋىنا اۋىل اكىمىن تارتىپتىك جاۋاپكەرشىلىككە تارتۋ تۋرالى ۇسىنىس ەنگىزدى.
- سەبەبى ول ءوز زاڭسىز ارەكەتتەرىمەن مەملەكەتتىك قىزمەتتىڭ بەدەلىن تۇسىرگەن. ادەپ كەڭەسىنىڭ شەشىمىمەن اۋىل اكىمىنە قىزمەتىنە تولىق سايكەس ەمەستىگى تۋرالى ەسكەرتىلدى، - دەلىنگەن حابارلامادا.
