شىعىس قازاقستاندا الىپ قىز بالا دۇنيەگە كەلدى
وسكەمەن. KAZINFORM - شىعىس قازاقستان وبلىسى تارباعاتاي اۋدانىندا سالماعى 5 كەلى الىپ قىز بالا تۋدى.
ش ق و دەنساۋلىق ساقتاۋ باسقارماسى باسپا ءسوز قىزمەتىنىڭ مالىمەتىنە سۇيەنسەك، ناۋرىز مەيرامى باستالعالى تارباعاتاي اۋداندىق اۋرۋحاناسىندا 9 ءسابي دۇنيە ەسىگىن اشقان.
- جاڭا تۋعان نارەستەلەر ۇلتتىق كيىم كيگىزىلىپ، شىعارىلدى. ولاردىڭ اراسىندا سالماعى 5 كەلىگە جەتەتىن الىپ قىز دا بولدى. اتا-اناسى وعان بەگىماي دەپ ات قويدى، - دەلىنگەن اقپاراتتا.
بۇدان بولەك، ناۋرىز مەيرامىنا وراي ريددەر قالاسىنىڭ مادەنيەت سارايىندا سالتاناتتى تۇردە تۇساۋكەسۋ ءراسىمى ءوتتى. بارلىعى 22 بالانىڭ تۇساۋى كەسىلىپ، اقساقالدار كەڭەسىنىڭ مۇشەلەرى اق باتاسىن بەردى. بالالارعا مەرەكەلىك سىيلىقتار دا تاراتىلدى.
ەسكە سالساق، بۇعان دەيىن ناۋرىز مەيرامى قارساڭىندا استانا قالاسىنداعى سەرۆيس جانە تۋريزم كوللەدج ۇجىمى ۇمىتىلىپ بارا جاتقان قازاقتىڭ ءداستۇرلى تاعامى - جەنتتى دايىنداۋدى قولعا الىپ، 15 مەترلىك جەنت جاساعانىن جازعان بولاتىنبىز.
