شىعىس قازاقستاندا 100 قوراپ ءتىرى شايان اكەتىپ بارا جاتقان براكونەرلەر ۇستالدى
شىعىس قازاقستان وبلىسىندا بيىل 5 تونناعا جۋىق بالىق اۋلاعان براكونەرلەر مەملەكەتكە 31 ميلليون تەڭگە شىعىن كەلتىردى، دەپ حابارلايدى Kazinform.
ش ق و پوليتسيا دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، پوليتسەيلەر «وسكەمەن- سامار» تاسجولىندا «گازەل» جۇك كولىگىن توقتاتقان.
انىقتالعانداي، 44 جانە 41 جاستاعى تۇرعىندار جالپى سالماعى 1800 كەلى بولاتىن 100 قوراپ ءتىرى شاياندى ءتيىستى قۇجاتسىز تاسىمالداعان.
وسىنىڭ سالدارىنان تابيعاتقا كەلگەن شىعىن سوماسى 11000000 تەڭگە بولدى.
«ولار شاياندى كۇرشىم اۋدانىندا بەلگىسىز ادامداردان ساتىپ الىپ، كەيىن وسكەمەن قالاسىندا ساتۋدى جوسپارلاعان. قازىرگى ۋاقىتتا ق ر ق ك- ءنىڭ 335-بابى 4-بولىگىنە سايكەس سوتقا دەيىنگى تەرگەۋ ءجۇرىپ جاتىر»، - دەلىنگەن اقپاراتتا.
وسىعان ۇقساس ەكىنشى فاكتى «كۇرشىم- ۇلكەن نارىن» تاسجولىندا تىركەلدى.
ۇلان اۋدانىنىڭ 44 جاستاعى تۇرعىنى تىزگىندەگەن جۇك كولىگىندە 92 قاپقا سالىنعان جالپى سالماعى ءبىر توننادان اساتىن ءتىرى شايان تابىلعان.
زالال سوماسى 7700000 تەڭگەدەن اسىپ وتىر.
شىعىس قازاقستان وبلىسىندا جىل باسىنان بەرى شاياندى زاڭسىز ءوندىرۋ مەن تاسىمالداۋدىڭ 5 فاكتىسى تىركەلدى.
ال جالپى براكونەرلەر بيىل 5 تونناعا جۋىق بالىق اۋلاپ، 31000000 تەڭگەدەن استام شىعىن كەلتىرگەن.
