شىعارماشىلىق سالا ماماندارىن دايارلاۋعا 1600دەن استام ءبىلىم گرانتى ءبولىندى
استانا. KAZINFORM - ق ر مادەنيەت جانە اقپارات مينيسترلىگىندە شىعارماشىلىق ماماندىققا مەملەكەتتىك ءبىلىم بەر گرانتتارىن ءبولۋ بويىنشا وتىرىس ءوتتى. بۇل تۋرالى ق ر مادەنيەت جانە اقپارات مينيسترلىگىنىڭ باسپا ءسوز قىزمەتى ءمالىم ەتتى.
تالقىلاۋعا مادەنيەت جانە اقپارات مينيسترلىگىنىڭ، وقۋ- اعارتۋ مينيسترلىگىنىڭ، عىلىم جانە جوعارى ءبىلىم مينيسترلىگىنىڭ، «اتامەكەن» ۇلتتىق كاسىپكەرلەر پالاتاسىنىڭ وكىلدەرى، ج و و باسشىلارى جانە ت. ب. قاتىستى.
مادەنيەت جانە اقپارات مينيسترلىگى ەلىمىزدىڭ 10 وقۋ ورنىندا شىعارماشىلىق مامانداردى دايارلايدى. ولار 4 جوعارى وقۋ ورنى، 4 كوللەدج جانە 2 ارنايى مەكتەپ.
«كەزدەسۋ قورىتىندىسى بويىنشا، 2024-2025 وقۋ جىلىنا 895 - باكالاۆريات، 166 - ماگيستراتۋرا جانە 26 - دوكتورانتۋراعا ءبىلىم گرانتىن ءبولۋ تۋرالى شەشىم قابىلداندى. كاسىپتىك جانە تەحنيكالىق ءبىلىم بەرۋ مەكەمەلەرى اراسىندا 550 بيۋدجەتتىك ورىن ءبولىندى. بۇل وتكەن وقۋ جىلىمەن سالىستىرعاندا 50 گرانتقا ارتىق»، - دەلىنگەن حابارلامادا.
ساراپشىلار شەشىم قابىلداۋ بارىسىندا ەڭ الدىمەن ەڭبەك نارىعىنىڭ قاجەتتىلىكتەرىن ەسكەردى. ناتيجەسىندە مۋزىكالىق تەاتر رەجيسسەرلەرىنە، مۋزىكاتانۋشىلارعا، رەستاۆراتور-سۋرەتشىلەرگە جانە ستسەناريستەرگە دەگەن جوعارى سۇرانىستى انىقتادى. وسىعان بايلانىستى جاڭا ءبىلىم بەرۋ باعدارلامالارىن اشىپ، گرانتتار سانىن كوبەيتۋ ارقىلى وسى ماماندىقتار بويىنشا كادرلار دايارلاۋعا نازار اۋدارۋ ۇسىنىلدى.
