شي جينپيڭ: جەكە سەكتوردىڭ قيىندىققا تاپ بولعانى راس، ءبىراق ءبارى ۋاقىتشا
استانا. KAZINFORM - قىتاي كوممۋنيستىك پارتياسىنىڭ باس حاتشىسى، قىتاي حالىق رەسپۋبليكاسىنىڭ ءتوراعاسى شي جينپيڭ 17- اقپان كۇنى بەيجىڭدە جەكە كاسىپكەرلەرمەن كەزدەسۋ وتكىزدى، دەپ حابارلايدى شينحۋا اگەنتتىگى.
الدىمەن جەكە كاسىپكەرلەردىڭ پىكىرىن تىڭداعان شي جينپيڭ قىتايدا جەكە كاسىپكەرلىكتىڭ رەفورما مەن اشىقتىق ساياساتى اياسىندا قارقىندى دامىپ كەلە جاتقانىن اتاپ ءوتتى. بۇگىندە ەلدەگى جەكە سەكتوردىڭ كولەمى اۋىز تولتىرىپ ايتارلىقتاي اۋقىمدى دەڭگەيگە جەتىپ، ەكونوميكانىڭ ماڭىزدى قۇرامداس بولىگىنە اينالىپ ۇلگەرگەن. جەكە كاسىپكەرلىكتى ساپالى دامىتۋعا ەلدە بەرىك نەگىز قالانعان.
ونىڭ پىكىرىنشە، جاڭا داۋىردە قىتايدا رەفورما مەن اشىقتىق ساياساتى ودان ءارى العا جىلجىپ، تەرەڭدەي تۇسپەك، ال 1,4 ميللياردتان استام تۇتىنۋشىسى بار ءىرى نارىق جەكە سەكتوردىڭ دامۋىنا جاڭا مۇمكىندىك پەن كەڭ ءورىس ۇسىنادى.
ول قازىرگى ۋاقىتتا جەكە كاسىپكەرلىكتىڭ دامۋى ءبىرقاتار قيىندىق پەن سىناققا تاپ بولىپ وتىرعانىن مويىندادى. ونىڭ ايتۋىنشا، بۇلار نەگىزىنەن رەفورمانى تەرەڭدەتۋ جانە سالانى ترانسفورماتسيالاۋ مەن جاڭعىرتۋ ۇدەرىسىندە تۋىنداعان شەكتەۋلى، ۋاقىتشا جانە شەشۋگە بولاتىن ماسەلەلەر.
شي جينپيڭ جەكە كاسىپكەرلىكتى دامىتۋعا باعىتتالعان ساياسات پەن شارالاردى ناقتى ءارى تياناقتى ىسكە اسىرۋدىڭ ماڭىزدىلىعىن اتاپ ءوتتى. ول جەكە كاسىپكەرلىكتى قارجىلاندىرۋدىڭ «قيىنعا توقتاۋى مەن قىمباتقا ءتۇسۋىن» شەشۋ، جەكە كاسىپورىنداردىڭ الاشاعىن ۋاقتىلى تولەۋ، زاڭنىڭ اتقارىلۋىنا باقىلاۋدى كۇشەيتۋ جانە جەكە بيزنەسكە قاتىستى باسى ارتىق الىمدار مەن ايىپپۇلداردى، تەكسەرۋ مەن تاركىلەۋدى بار كۇشپەن رەتكە كەلتىرۋ، ءسويتىپ، جەكە كاسىپكەرلەردىڭ مۇددەسىن زاڭعا سايكەس قورعاۋ كەرەك دەپ اتاپ ءوتتى.
سونىمەن قاتار، كەز كەلگەن مەنشىك نىسانىنداعى كاسىپورىننىڭ زاڭسىز ارەكەتى جاۋاپكەرشىلىكتەن تىس قالماۋى ءتيىس ەكەنىن ەسكەرتتى. ونىڭ ايتۋىنشا، مەملەكەت پەن بيزنەس اراسىنداعى اشىق ءارى تازا قارىم- قاتىناستى نىعايتا ءتۇسۋ ءۇشىن بارلىق كاسىپورىنعا بىردەي كوزقاراس ۇستانۋ قاجەت.
DW اگەنتتىگىنىڭ جازۋىنشا، سوڭعى جىلدارى شي جينپيڭ «ورتاق ءال- اۋقاتقا» قول جەتكىزۋدى باستى ماقسات رەتىندە اتاپ، جەكە كاسىپكەرلەردى قىتاي كوممۋنيستىك پارتياسىمەن جانە قىتايلىق سوتسياليزممەن ساياسي، يدەولوگيالىق جانە ەموتسيونالدىق بىرەگەيلىكتى ساقتاۋعا تارتۋدىڭ قاجەتتىلىگىن بىرنەشە رەت مالىمدەگەن بولاتىن. قازىرگى كۇندە قىتايدا جەكە كاسىپكەرلىكتىڭ دامۋى اۋىر قىسىمعا ۇشىراپ وتىر دەگەن پىكىر ءجيى ايتىلىپ كەلەدى.
سوڭعى جىلدارى قىتاي ەكونوميكاسىنىڭ ءوسىمى باياۋلاپ، جىلجىمايتىن مۇلىك نارىعىندا داعدارىس ەتەك الىپ كەلەدى. ونىڭ ۇستىنە تۇتىنۋشىلىق سۇرانىس تومەندەپ، جاستار اراسىنداعى جۇمىسسىزدىق دەڭگەيى جوعارى كورسەتكىشتى كورسەتىپ وتىر.
ساراپشىلاردىڭ پىكىرىنشە، بيلىك وسى كەزدەسۋ ارقىلى جەكە كاسىپكەرلىككە قايتادان سەنىم ارتىپ، قولداۋ كورسەتۋگە دايىن ەكەنىن بىلدىرگىسى كەلەدى.
