شي جينپيڭ ازيا-تىنىق مۇحيتى ەلدەرىنىڭ ەكونوميكالىق ىنتىماقتاستىعى سامميتىندە دجو بايدەنمەن كەزدەسەدى
ا ق ش پرەزيدەنتى دجو بايدەن مەن قىتاي ءتوراعاسى شي جينپيڭ 15- قاراشادا ازيا-تىنىق مۇحيتى ەلدەرىنىڭ ەكونوميكالىق ىنتىماقتاستىعى سامميتى (ا ت ە س) اياسىندا كەزدەسەدى. بۇل تۋرالى اق ءۇيدىڭ رەسمي سايتىندا جازىلعان، دەپ حابارلايدى قازاقپارات.
«پرەزيدەنت دجو بايدەن قىتاي حالىق رەسپۋبليكاسىنىڭ ءتوراعاسى شي جينپيڭمەن 15- قاراشا كۇنى سان-فرانتسيسكودا كەزدەسەدى» - دەلىنگەن حابارلامادا.
بۇل – ا ق ش جانە قىتاي كوشباسشىلارىنىڭ ەكى جىلداعى بەتپە-بەت وتەتىن العاشقى كەلىسسوزدەرى بولماق.
CNN حابارلاۋىنشا، مەملەكەت باسشىلارى يزرايلدەگى جاعدايدى جانە كليماتتىق ىنتىماقتاستىق ماسەلەلەرىن تالقىلايدى.
ا ت ە س ءسامميتى - اتەس ەلدەرى باسشىلارىنىڭ جىل سايىنعى ءسامميتى.
بيىلعى جىلى ول 11-17- قاراشا كۇندەرى سان-فرانتسيسكودا وتەدى. شارانىڭ تاقىرىبى - «بارلىعى ءۇشىن ومىرشەڭ جانە تۇراقتى بولاشاق قۇرۋ».
ۇيىمعا 21 مەملەكەت، سونىڭ ىشىندە قىتاي، رەسەي جانە ا ق ش كىرەدى.
