شەتەلدىكتەرگە ىقتيارحات الۋ جەڭىلدەيدى
استانا. KAZINFORM - شەتەلدىكتەردىڭ ىقتيارحات الۋىن جەڭىلدەتەتىن سۇرانىسقا يە كاسىپتەر تىزبەسى وزگەرەدى. «اشىق ن ق ا» پورتالىندا وزگەرىستەر جوباسى جاريالاندى.
قۇجات ق ر ەڭبەك جانە حالىقتى الەۋمەتتىك قورعاۋ مينيسترلىگى دەنساۋلىق ساقتاۋ، مادەنيەت جانە اقپارات، سيفرلىق دامۋ جانە ايەروعارىش ونەركاسىبى مينيسترلىكتەرىنىڭ ۇسىنىستارى نەگىزىندە ازىرلەنگەن.
«شەتەلدىكتەردىڭ قازاقستان رەسپۋبليكاسىندا تۇراقتى تۇرۋعا رۇقسات الۋى ءۇشىن تالاپ ەتىلەتىن كاسىپتەر تىزبەسىنە وزگەرىستەر مەن تولىقتىرۋلار ەنگىزۋ جوسپارلانىپ وتىر»، - دەپ جازىلعان قۇجاتتا.
بۇل تىزىمگە دەنساۋلىق ساقتاۋ، جاراتىلىستانۋ عىلىمدارى، وڭدەۋ ونەركاسىبى، IT- تەحنولوگيالار، يننوۆاتسيالار جانە ايەروعارىش ونەركاسىبى جانە باسقا دا ماماندىقتار كىرگەن.
«تىزبەدە بارلىعى سۇرانىسقا يە 51 كاسىپ قاراستىرىلادى»، - دەپ حابارلادى ق ر ەڭبەك جانە حالىقتى الەۋمەتتىك قورعاۋ مينيسترلىگى.
مۇندا سالالىق مەملەكەتتىك ورگاندار ۇسىناتىن وزگەرىستەر مەن تولىقتىرۋلار ەسكەرىلگەن. سۇرانىسقا يە ماماندىقتار قاتارىندا جاساندى ينتەللەكت ينجەنەرلەرى، web ازىرلەۋشىلەر، ءموبيلدى قوسىمشالاردى ازىرلەۋشىلەر، كومپيۋتەرلىك ويىنداردى ازىرلەۋشىلەر، اقپاراتتىق جۇيەلەر ساۋلەتشىلەرى، سەرۆەر اكىمشىلەرى، اقپاراتتىق قاۋىپسىزدىك مامانى، گرافيكالىق ديزاينەرلەر، سۋرەتشى يلليۋستراتورلار، اكۋشەر گينەكولوگتار، انەستەزيولوگ- رەانيماتولوگتار، ساۋلەلىك دياگنوستيكا دارىگەرلەرى بار.
تىزبەدە كورسەتىلگەن ماماندىقتارى بار شەتەلدىكتەر ىشكى ىستەر ورگاندارىندا تۇرۋعا ىقتيارحاتتى وڭايلاتىلعان تارتىپپەن رەسىمدەي الادى. ىقتيارحات 10 جىلعا نە پاسپورتتىڭ قولدانىلۋ مەرزىمىنە بەرىلەدى.
ن ق ا جوباسىمەن 13-ناۋرىزعا دەيىن تانىسۋعا بولادى.
