شەتەلدىكتەرگە جەر بەرۋ تالقىلانعان جوق جانە قارالمايدى دا - ۇكىمەت باسشىسى
اۋىل شارۋاشىلىعىنا ارنالعان جەر تەلىمدەرى شەتەلدىك ينۆەستورلارعا بەرىلمەيدى. بۇل تۋرالى پرەمەر- مينيستر ءاليحان سمايىلوۆ ءمالىم ەتتى، دەپ حابارلايدى Kazinform.
بۇگىن سەناتتىڭ جالپى وتىرىسىنان كەيىن تىلشىلەر ۇكىمەت باسشىسىنان باتىس قازاقستان حالقى قىتايلىقتارعا جەر بەرۋگە قارسىلىق ءبىلدىرىپ، ۇندەۋ جولداپ جاتقانى جايىندا سۇراق قويدى.
ءوز كەزەگىندە ءاليحان سمايىلوۆ قازاقستاننىڭ جەر كودەكسىندە شەتەلدىكتەرگە نەمەسە شەتەل كومپانيالارىنا، سونداي-اق شەتەلدىكتەردىڭ قاتىسۋىمەن جۇمىس ىستەپ جاتقان قازاقستاندىق كومپانيالارعا اۋىل شارۋاشىلىعىنا ارنالعان جەردى پايدالانۋعا بەرۋگە تىيىم سالىنعانىن ەسكە سالدى.
«مۇنداي قۇقىق تەك قازاقستان حالقىندا عانا بار. سوندىقتان شەتەلدىكتەرگە جەر بەرۋ قارالىپ جاتقان جوق جانە قارالمايدى دا. بۇل - ءبىزدىڭ ناقتى ۇستانىم. وسى جونىندە مەملەكەت باسشىسى ناقتى پىكىرىن ايتقان ەدى. سوندىقتان شىندىققا جاناسپايتىن اقپارات تاراپ جاتىر. كەيبىر ينۆەستورلار وزدەرىنىڭ ۇسىنىستارىن ايتقان. بۇدان ءارى اسقان جوق، ياعني ەشقانداي كەلىسىم جاسالماعان»، - دەدى پرەمەر-مينيستر.
بۇدان بۇرىن حابارلانعانداي، جاقىندا باتىس قازاقستان وبلىسىنىڭ اكىمى ناريمان تورەعاليەۆ كيىك ەتىن جانە وزگە دە بولىكتەرىن وڭدەۋ تۋرالى ساۋالعا جاۋاپ بەرگەن.
ايماق باسشىسى كورشى ەلدەن ينۆەستور كەلىپ، زاۋىت سالۋعا ۇسىنىس بىلدىرگەنىن ايتتى.
الايدا جەر بەرۋ تۋرالى شەشىم بولماعان.
