شەتەلدىك تۋريستەرگە سالىناتىن جارنا قايتارىلا ما - ۆيتسە-مينيستر جاۋاپ بەردى

ۆيتسە-ءمينيستردىڭ ايتۋىنشا، تۋريستەرگە ارنالعان جارنا الەمنىڭ كوپتەگەن ەلدەرىندە ءساتتى قولدانىلىپ كەلەدى. ءبىراق تۋريزمنىڭ دامۋىنا كەدەرگى بولماۋ ءۇشىن قازاقستان سالىقتىڭ بۇل تۇرىنەن ۋاقىتشا باس تارتقان.

- Bed tax تۋريستىك جارناسى ارقىلى شەتەلدىك مەيمانداردان 1 جىلعا جۋىق ۋاقىت ىشىندە الماتىدا 500 ميلليون تەڭگەدەن استام قاراجات جينالدى. 2-3 دوللار ولار ءۇشىن كوپ ەمەس، ال بيۋدجەت ءۇشىن سوڭىندا جاقسى تابىس اكەلەدى. ءبىراق باسشىلىق قازاقستان تۋريزمىنىڭ دامۋىنىڭ قازىرگى ساتىسىندا شەتەلدىك تۋريستەرگە بارىنشا از اۋىرتپالىق ءتۇسىرۋ كەرەك دەپ شەشىم قابىلدادى، - دەدى ۆيتسە-مينيستر.

سونداي-اق ەرجان ەركىنبايەۆ شەتەلدىك تۋريستەردىڭ جارناسى زاڭنامالىق تۇرعىدا ساقتالعانىن اتاپ ءوتتى.

- بۇگىن ەل بويىنشا جارنا كولەمى 0 تەڭگە بولىپ بەلگىلەنگەن. ءبىراق bed tax زاڭنان الىنعان جوق. بولاشاقتا قازاقستان ءتۋريزمى ايتارلىقتاي دامىعانىن ايتا باستاعان كەزدە ءبىز سۇراققا قايتىپ ورالامىز، - دەدى ول.

ۆيتسە-مينيستر الماتىنىڭ ەرەكشە مارتەبەسىن ەسكەرە وتىرىپ، مەگاپوليستىڭ وزىندە عانا تۋريستىك جارنانى ەنگىزۋ قانشالىقتى مۇمكىن ەكەنىن ايتتى.

- بۇل مۇمكىن. ءبىراق بۇل سۇراقتى پرەزيدەنت اكىمشىلىگىمەن بىرگە قاراستىرامىز. ەگەر پرەزيدەنت اكىمشىلىگىنىڭ ساراپشىلارى مەن ۇكىمەت تاراپى بەلگىلى ءبىر وڭىرگە جەكە تۋريستىك جارنانى قولدانۋ مۇمكىن بولاتىنىن ايتسا، ءبىز قارسى بولمايمىز، - دەدى ەرجان ەركىنبايەۆ.

ەسكە سالايىق، ق ر تۋريزم جانە سپورت ءمينيسترىنىڭ 2023-جىلدىڭ 27-جەلتوقسانىنداعى  347-بۇيرىعىمەن قازاقستاننىڭ بۇكىل اۋماعىندا نولدىك ستاۆكا بەكىتىلدى جانە 2024-جىلى 21-اقپان كۇنى الماتى ءماسليحاتى شەتەلدىك تۋريستەر ءۇشىن جارنا قۇنىن 0 تەڭگەگە وزگەرتتى.

ودان كەيىن الماتى قالاسىنىڭ ءماسليحاتى ق ر تۋريزم جانە سپورت مينيسترلىگىنە تۋريستىك جارنانىڭ ستاۆكالارىن ءوز بەتىنشە بەكىتۋگە قۇزىرەتتىلىك بەرۋ تۋرالى ۇسىنىس جولداعان بولاتىن.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى