شەتەلدىك ستۋدەنتتەر ءۇشىن كوپ مارتەلىك ەلەكتروندى ۆيزا ەنگىزىلەدى

- قازاقستاندا جەتەكشى شەتەلدىك ۋنيۆەرسيتەتتەردىڭ 40 فيليالى اشىلىپ جاتىر. بۇگىندە ەلىمىزدە 31500 شەتەلدىك ستۋدەنت ءبىلىم الۋدا - تاريحي رەكورد. ماقسات - بۇل ساندى 2029 -جىلعا قاراي 150000-عا جەتكىزۋ. ول ءۇشىن شەتەلدىك ستۋدەنتتەرگە، سونداي-اق عالىمدار، پروفەسسورلارعا، ماماندارعا ۆيزا بەرۋ ءتارتىبىن قايتا قاراستىرۋىمىز قاجەت. شەتەلدىك ستۋدەنتتەر ءۇشىن كوپ مارتەلىك ەلەكتروندى ۆيزا جاڭادان قاراستىرىلادى، - دەدى مينيستر ۇكىمەت وتىرىسىندا.

ونىڭ ايتۋىنشا، ەلىمىزدىڭ كوشى-قون ساياساتى تۇجىرىمداماسىندا سۇرانىسقا يە ماماندىقتار بويىنشا ۆيزالاردى ەنگىزۋ قاراستىرىلعان. مۇنداي ۆيزالار عىلىم، ءبىلىم، تەحنولوگيالار سالالارىندا قۇندى داعدىلارى بار شەتەلدىك ماماندارعا جانە ەتنيكالىق قازاقتارعا بەرىلەدى.

- حالىقارالىق تاجىريبە كورسەتكەندەي، مۇنداي مۇمكىندىكتەر كوپ ەلدە بار. مىسالى، كانادادا تۇلەكتەرگە 1 جىلدان 3 جىلعا دەيىن جۇمىس ىستەۋگە رۇقسات بەرەتىن قۇجات بار. دۋبايدا شەتەلدىك ستۋدەنتتەر ۇزاق مەرزىمدى ۆيزالار الادى، ال ۇزدىك ستۋدەنتتەرگە ارنايى «التىن ۆيزا» بەرىلەدى. ماسكەۋدە ستۋدەنتتەرگە «ماسكەۋلىك كارتا» جۇمىس ىستەيدى، - دەدى ساياسات نۇربەك.

ايتا كەتەيىك، كەشە مەملەكەت باسشىسى جولداۋىندا شەتەلدەن ەلىمىزدى دامىتۋعا ۇلەس قوسا الاتىن مىقتى مامانداردى ۇلتىنا قاراماي تارتۋ تۋرالى تاپسىرما بەرگەن بولاتىن.

اۆتور

ەربول جانات

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى