شەتەلدىك ارىپتەستەردى قازاقستانداعى جوبالارعا ينۆەستيتسيا سالۋعا شاقىرامىن - ءاليحان سمايىلوۆ

پرەمەر- مينيستر قازاقستان ۇكىمەتىنىڭ الدىندا 2029-جىلعا قاراي ەكونوميكا كولەمىن $450 ميلليارد- قا، ياعني، ەكى ەسەگە ارتتىرۋ بويىنشا اۋقىمدى مىندەت تۇرعانىن اتاپ ءوتتى.

«ءبىز ESG پرينتسيپتەرىن ەسكەرە وتىرىپ، بۇل ۋاقىتتا كەمىندە $150 ميلليارد شەتەلدىك ينۆەستيتسيا تارتۋدى جوسپارلاپ وتىرمىز. وسى ماقساتتارعا جەتۋ ءۇشىن ەلىمىزدىڭ ينۆەستيتسيالىق احۋالىن ودان ءارى جاقسارتۋ باعىتىندا جۇيەلى شارالار قابىلدانۋدا»، - دەدى ول.

ءاليحان سمايىلوۆ اتاپ وتكەندەي، شەتەلدىك ينۆەستورلار كەڭەسىنىڭ كەلەسى پلەنارلىق وتىرىسى «قازاقستاندى جاڭا يندۋستريالاندىرۋ» تاقىرىبىنا ارنالادى.

«مەملەكەت باسشىسى قازاقستان حالقىنا جولداۋىندا ەلدىڭ ونەركاسىپتىك نەگىزىن قالىپتاستىرۋدىڭ ماڭىزدىلىعىن اتاپ ءوتتى. ۇكىمەت جۇمىسى ينۆەستيتسيالار كولەمىن ۇلعايتۋعا، وزىق تەحنولوگيالاردى ترانسفەرتتەۋگە، وندىرىستەردى لوكاليزاتسيالاۋعا جانە جوعارى دەڭگەيدە وڭدەلگەن ءونىم شىعاراتىن كلاستەرلەر قۇرۋعا باعىتتالعان. وڭدەۋ سەكتورىن جەدەل دامىتۋعا باسىمدىق بەرىلەتىن بولادى»، — دەدى ول.

ونىڭ ايتۋىنشا، بۇل ءۇشىن قاجەتتى زاڭنامالىق بازا مەن ينستيتۋتسيونالدىق ورتا قالىپتاستىرىلدى.

«ونەركاسىپتىك ساياسات تۋرالى» زاڭ قابىلدانىپ، جاڭادان ونەركاسىپ جانە قۇرىلىس مينيسترلىگى قۇرىلدى.

«ۇكىمەت ەكونوميكانىڭ ءوسۋ سەرپىنىن ساقتاۋ جانە ەلدەگى ينۆەستيتسيالىق احۋالدى جاقسارتۋ جونىندە بارلىق قاجەتتى شارالاردى قابىلدايدى. ءبىز شەتەلدىك ارىپتەستەرىمىزدى قازاقستانداعى جوبالارعا ينۆەستيتسيا سالۋعا شاقىرامىز»،— دەپ اتاپ ءوتتى ءاليحان سمايىلوۆ.

كەڭەس بارىسىندا Ernst Young, TotalEnergies, Knauf, KPMG كومپانيالارىنىڭ وكىلدەرى جانە ق ر ورتالىق مەملەكەتتىك ورگاندارىنىڭ باسشىلارى ءسوز سويلەدى.

تالقىلاۋ قورىتىندىسى بويىنشا پرەمەر- مينيستر ايتىلعان بارلىق ۇسىنىستار مەن پىكىرلەردىڭ پىسىقتالاتىنىن اتاپ ءوتتى.

سونداي- اق ءىس- شارا اياسىندا ءاليحان سمايىلوۆ شەتەلدىك ينۆەستورلار كەڭەسىن جانە جالپى رەسپۋبليكانىڭ ينۆەستيتسيالىق احۋالىن دامىتۋعا قوسقان ۇلەسى ءۇشىن العىس حاتتار تابىس ەتتى.

اتاپ ايتقاندا، Coca Cola Iecek Kazakhstan, Microsoft, Baker McKenzie, Cameco Kazakhstan, Chevron Corporation, Deloitte, Exxon Mobil, Glencore, Marubeni كومپانيالارىنا جانە ت. ب. بەرىلدى.

«وسى جىلدارى بىرلەسكەن كۇش- جىگەردىڭ ارقاسىندا جاڭا ءوندىرىس ورىندارى ىسكە قوسىلدى، ءىرى جوبالار جۇزەگە اسىرىلدى، ەڭ باستىسى، مىڭداعان جۇمىس ورىندارى اشىلدى. ىنتىماقتاستىعىمىز ءوزارا ءتيىمدى بولىپ، ۇلكەن پەرسپەكتيۆالارعا جول اشىپ، تۇراقتى تۇردە دامي بەرەتىنىنە سەنىمدىمىن. قازاقستان ۇكىمەتى ينۆەستيتسيالىق بايلانىستاردى تەرەڭدەتىپ، جاڭا بىرلەسكەن جوبالاردى جۇزەگە اسىرۋعا دايىن»، — دەدى پرەمەر- مينيستر.

شەتەلدىك ينۆەستورلار كەڭەسى ق ر پرەزيدەنتىنىڭ جانىنداعى كونسۋلتاتيۆتىك- كەڭەسشى ورگان بولىپ تابىلادى.

كەڭەستىڭ نەگىزگى مىندەتى — قازاقستاننىڭ ينۆەستيتسيالىق ساياساتىنىڭ نەگىزگى باعىتتارىن ايقىنداۋ، ينۆەستيتسيالىق احۋالدى جاقسارتۋ جانە ق ر ينۆەستيتسيالار تۋرالى نورماتيۆتىك قۇقىقتىق بازاسىن جەتىلدىرۋ بويىنشا ۇسىنىمدار مەن ۇسىنىستار ازىرلەۋ.

قازىرگى ۋاقىتتا كەڭەس قۇرامىنا 33 ءىرى ترانسۇلتتىق شەتەلدىك كومپانيا مەن حالىقارالىق ۇيىمدار باسشىلارى، سونداي- اق شەتەلدىك تاراپتان 9 باقىلاۋشى كىرەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى